政Whats噏：葉劉買半山物業贈愛女　慳印花稅蝕樓價

樓市下滑，反而係置業時機？身兼行政會議召集人嘅議員葉劉淑儀，最近喺自住嘅中半山屋苑嘅同一幢大廈，再購買一個單位畀女兒自住。雖然斥資5,000多萬港元，但由於採用公司轉讓形式購入，葉劉節省15%嘅印花稅，無形中慳咗稅項逾7百萬港元。之不過，有銀行估價，佢新購嘅物業跌價，由簽署買賣合約至今，帳面損失可能逹200多萬港元。

話說葉劉淑儀更新利益申報，喺原有自住嘅中西區單位同荃灣嘅工商物業之外，又以今年3月成立、本港註冊公司「Magic Fiddle Limited」嘅名義，「間接擁有一個位於中西區的住宅單位連一個車位作自住用途」。新購入嘅單位，同佢現居嘅寓所屬於同一幢。睇返公司註冊處記錄，「Magic Fiddle Limited」嘅創辦成員同董事，就係葉劉同埋佢嘅女兒葉榮欣。葉劉向傳媒表示，新物業嘅購入價係5,180萬港元，用嚟畀女兒自住，由於以公司轉讓形式購入，需付稅額只有0.2%，即10.36萬港元，等如節省15%嘅印花稅，慳返約766萬港元。佢承認呢種買樓方法可以慳稅，況且好多人都係咁做。

由於該單位未有承按記錄，換言之係一筆過付款。雖然葉劉慳咗稅款，但有銀行估價，葉劉新購入嘅單位若撇除價值約300萬港元嘅車位，最新估價約4,600百多萬港元，即是葉劉帳面損失約200多萬港元。