政Whats噏： 茅台變毛氈 　鄧飛空歡喜一場　

話說議員鄧飛早排就搭內陸機去素有「泉城」之稱嘅山東省濟南市，喺機上同內地空姐就因為語言差異鬧出笑話，仲令佢空歡喜一場。

鄧飛近日就喺社交網站度分享去泉城嘅一則趣事，喺飛機度竟然有內地空姐問佢飲唔飲「茅台」。其實一般飛機上有紅酒同香檳都唔奇怪，但估唔到呢班機竟然有更高級嘅「茅台」酒，佢即刻話好。

冇耐，空姐攞咗張氈出嚟，仲話「先生，您要的『毛毯』。」相信當時鄧飛都睇到眼到凸埋。唔通個空姐怕佢飲完酒會覺得凍要保暖？非也！跟住佢先諗起普通話先會用「毛毯」，而粵語一般講係「氈」，只係佢一下子冇喺「氈」轉返「毛毯」。最令佢意外嘅係點解會聽錯成「茅台」呢？可能係普通話，「茅台」同「「毛毯」讀音差唔多，一時聽錯，又或者佢確實一心想飲茅台，所以先入為主都唔定？