政Whats噏：狄志遠同梁朝偉合照　《流氓醫生》睇咗30次

議員們雖然作為政壇「明星」，但面對真正演藝界嘅明星嘅時候，都係會化身粉絲咁。好似尋日咁，幾個議員就輪流同影帝梁朝偉合照嘞！

話說梁朝偉尋日出席一個活動做頒獎嘉賓，社福界議員狄志遠自己只係咁啱都到呢個活動，仲話話好多人都想同梁朝偉影相，而佢都成功爭取合照喎。佢話梁朝偉係「明星中的明星」，因為覺得梁朝偉好有魅力，作為演員演咩類型角色都好好演技，自己都好欣賞佢。

咁佢最鍾意梁朝偉邊套電影呢？狄志遠話最中意《流氓醫生》，自己成日會喺食飯嘅時候睇呢套電影，觀看次數不下20至30次喎！佢話最欣賞梁朝偉喺戲入面不畏權貴、為貧苦階層醫治嘅角色，仲覺得呢個角色好有性格添！

唔單止狄志遠同梁朝偉有單獨合照，同場嘅幾位議員，包括鄧飛同鄧家彪，仲有港大醫學院兒童及青少年科學系臨床副教授葉柏強，都有同梁朝偉一齊影相，睇嚟影帝嘅魅力沒法擋呀！