政Whats噏：容海恩陈家珮等3议员退场　立会好声音传腰斩

建制派“班长”议员廖长江日前为一众议员发出“温馨提示”，话如果议员从事在立法会以外活动比较活跃，相关嘅报道多过议会嘅工作，会令人觉得系不务正业，令人关注嚟紧嘅“立会好声音”会唔会受班长言论影响而腰斩，有参加相关演唱会嘅议员就话活动如常举行，但亦有议员不排除会退场。

容海恩、何敬康同陈家珮就喺社交平台贴文，话讨论过有关“立会好声音”表演事宜，经讨论后，佢哋决定今次唔会参与表演节目，希望市民多聚焦喺佢哋嘅议会工作。

据闻，主办方仲谂紧搞唔搞，因为“日日咁写法”压力好大，认为再咁落去都无乜意思，预计今日内会有结果。而有参加嘅议员都话尊重主办方决定。

有13名议员将于“立会好声音”演出，而参加者之一嘅管浩鸣(管牧)话好声音会继续搞，因为呢个都系10.1活动，所谓“立会好声音”都系借之前大热嘅节目“中年好声音”做嘅“Gimmick ”，加上自己都系凭良心自己做，又唔系年年搞，人哋点讲冇办法，“临时唔搞仲奇怪”，而目前仲未收到有人想退场。佢解释，点解自己会唱歌系因为一开始系地区活动有唱歌助兴，虽然觉自己唱得唔太好，但纯粹系谂住娱乐吓街坊。

管牧认为班长嘅言论唔系针对佢哋嘅活动，因为佢哋又唔系唔做其他嘢净系挂住唱歌，当然唔好，自己亦唔系咁，但有时做地区活动，人哋叫你唱，有时都比较难推，加上唱歌都主要系街坊联谊性质嘅。被问到会唔会因为社会关注度，“立会好声音”会搞得无咁夸张，佢话其实本来个模式都唔铺张喎。

另一个参加者李镇强就话呢个活动都系做开心嘢。被问到会唔担心自己畀人同班长嘅说话扣连，佢话“好多嘢都可以扣连”，呢个活动又唔系食饭饮酒，仲要系免费派飞畀市民参加。虽然系咁，但佢话自己都会同班参加者倾吓睇吓佢哋点睇。

不过，其他有参加嘅议员就向东网讲，本来活动系想为社会带正能量，“本意系好，但依家同预期效果可能唔同”，观感唔同咗可能要再谂谂点处理，仲话“唔排除会退场”。

早前黄大仙民政专员黄智华筵开多席嘅欢送晚会，惹嚟各方嘅批评，令人关注政界人士日常嘅一言一行。未几，就爆出班长对一众议员嘅“温馨提醒”，当中有几句讲到，如果市民经常见到议员频繁参与各种饮宴同一般应酬，或者出席各种娱乐活动或开幕仪式、打卡，出场比出席会议多，跑场比跑区多，冇实质嘅工作成果或表现，会认为议员没有尽忠职守，浪费公帑，立法会难以有信誉。

同时又提醒如果议员从事议会以外活动，好似舞蹈、唱歌、演艺活动、体育活动等嘅频率比较活跃，有关报道比立法会工作更多，市民自然可能会觉得系不务正业，要求议员留意呢啲问题喎。