政Whats噏：水浸街　李梓敬筲箕捞垃圾　郑泳舜铲泥

全城水浸！唔少议员都落区视察灾情，然后透过社交平台交代最新进展，李梓敬都唔例外，仲同班兄弟姐妹攞住胶筲箕落街添！

胶筲箕？当然喇！水浸就因为啲渠塞咗去唔到水吖嘛！话说沙田围站对出嘅逸泰街，暴雨下变咗一条泥河，的士都浸晒。李梓敬同班兄弟姊妹就用胶筲箕，捞起浸喺泥水里面嘅垃圾。

由于完全睇唔到黄泥水下嘅渠口位，佢哋都系估估下，或者探手入黄泥水里面摸索，确定有渠口就索性抓起塞住嘅垃圾，务求可以快啲去水。搞咗几耐？几个人夹手夹脚努力咗一粒钟，一条河变返一条街嘞！

实际上，油尖旺同深水埗亦出现水浸同大量淤泥嘅情况，议员郑泳舜就落区铲泥，帮手清理堵塞渠口嘅杂物树枝等。佢仲话虽然依家所有暴雨警告已取消，但世纪暴雨过后，市区路面湿滑且有积水，亦有山泥倾泻风险，呼吁市民外出时要小心注意安全。