政Whats噏:落後星洲電子政府 邱達根話港智方便要急起直追

2023年09月14日 19:30
東網電視
更多新聞短片
邱達根(右二)同黃錦輝(左二)聽取有關Singpass嘅發展。
香港同新加坡向來都係競爭對手,同時又係參考對象,城中唔少政界人士都會組團去彼邦考察,睇到人哋嘅好,同時當然睇到自己嘅差,例如「智方便」。
香港創新科技界近日組團考察新加坡,同行嘅包括業界議員邱達根(Duncan),同埋身兼中文大學工程學院副院長嘅議員黃錦輝。Duncan喺社交平台貼文,話日前去到新加坡政府技術局(GovTech)交流,喺對方講解中得知Singpass係新加坡國民嘅數碼個人身份證明,可以用嚟登入所有新加坡政府網站,申請各項公共服務,甚至係註冊公司、交稅、簽署合同買賣交易、申請私人銀行服務等,覆蓋率達97%之高。了解Singpass發展之後,Duncan不禁話香港雖然都有推出「智方便」,可惜使用率偏低,睇嚟有必要急起直追。
其實港府曾預計2024年政府服務可以全面電子化,2025年前更可以推動所有政府部門採用「智方便」提供一站式服務,實現「一網通」目標。但係過往唔少議員都對「智方便」有好大意見,不但下載率低,部分議員話「智方便」嘅登記同驗證程序繁瑣,所以批評「智方便」係「至唔方便」。落後咁多,唔知點追呢?