政Whats噏：感受新疆夜繽紛　林振昇：造大個餅人流旺

為咗吸引多啲遊客嚟同挽留番啲北上港人留港消費，政府喺上周公布一系列嘅「香港夜繽紛」活動，毀譽參半。議員林振昇亦感受過夜繽紛，但唔係喺香港。

近排好多議員外訪考察，葛珮帆去咗新疆睇棉花田，話口未完就見到林振昇都去咗新疆喎。新疆變咗熱點？

林振昇喺社交平台貼文話喺感受香港夜繽紛之前，早幾日亦去咗新疆烏魯木齊，亦有機會逛下新疆夜市，品嘗新疆特色小食，感受一吓當地嘅夜繽紛，話當地好熱鬧。

新疆夜繽紛係點嘅？佢話街邊市集設喺大型商場旁邊，睇嚟唔會互相競爭，仲可以「造大個餅」，而大型商場同街邊市集即使到咗晚上11點幾，仲有唔少人繼續活動，而且嚟新疆嘅遊客數目比疫情前增加咗一倍。佢亦期望香港能夠透過一系列嘅優惠活動帶旺市道，令更多市民同遊客再度感受香港多姿多采嘅夜生活。

香港搞夜繽紛係咪可以令遊客數字翻兩番？但係公布咗措施之後，北上港人不減反增，外界已質疑成效不彰，再加上深圳又公布便利港人北上嘅措施，夜繽紛有冇成效真係要拭目以待嘞！