政Whats噏：要求員工用樂悠卡搭車　議員聯署促政府同九巴解畫

話說九巴近日發出內部通告，更改年滿60歲員工及家屬免費搭巴士安排，改為以「樂悠咭」即政府兩元乘車優惠搭車，呢個安排惹起爭議，兩名議員吳秋北同郭偉強聯署立法會福利事務委員主席鄧家彪，要求下次會議加入呢個議程，同埋叫政府同九巴派代表嚟解畫。

聯署書提及收到九巴員工同汽車交通運輸業總工會分反映有關情況。兩名議員認為咁做即係九巴只需發還乘客所付2蚊車費，餘額由政府補貼，據悉，受影響約二萬人，估計政府每月需補貼逾1,000萬港元。

兩名議員直指九巴作為參與政付2蚊計劃嘅公共交通營辦商，本身已因長者乘車次數同政府補貼金額增加而得益，卻試圖利用計劃漏洞，不但減省退休員工福利開支，更反過來變成公司收入來源，此舉涉嫌濫用公帑，增加政府財政負擔。

針對有關漏洞，佢哋認為政府若果唔即時堵塞，可能令一些市民產生慷他人之慨嘅觀感，忽略政府透過計劃關愛長者嘅初心，甚至將計劃污名化，從而要求降低優惠幅度，最終令全港60歲或以上長者共同受害。