政Whats噏：亞運高球奪冠　田北辰重提保留粉嶺「舊場」

雖然粉嶺高爾夫球「舊場」已被政府收回，但仲有好多人念念不忘。就香港高爾夫球代表喺杭州亞運奪得兩面獎牌，議員田北辰(田二少)今日(1日)喺社交平台貼文道賀，形容今次嘅成績，係香港高球運動歷史性嘅一刻。跟住佢又舊事重提，話粉嶺高爾夫球「舊場」必須保留。

田二少話高爾夫球運動，絕對值得政府大力支持，而佢亦多次喺議會裏面提出保留粉嶺高爾夫球「舊場」以充當公眾球場，認為此舉有助發展高球產業，況且培育高球新秀亦需要場地。

被收回嘅高球場用地係咪要用嚟起樓，依家都係未知之數。查實田二少曾經喺立法會就高球場問題提出口頭質詢，話建屋是上屆政府嘅建議，現時當局已搵到足夠嘅土地建屋，係咪已經冇迫切性要收返高球場嘅土地建屋，仲話希望有關土地轉做公眾球場，推動高球普及化同精英化。

儘管部分「舊場」已被闢為「寵物共享公園」，但田二少都期望政府可以回心轉意，保留球場。