政Whats噏：指議員要履行職責　梁君彥：大家有眼睇嘅

繼建制派班長廖長江發出「溫馨提示」，日前又有指示要議員喺大會期間若離開1小時以上要申報後，立法會今日(18日)復會，相信眾議員都打醒十二分精神。

被問及議員開會報到係咪合適、理想嘅做法，立法會主席梁君彥話議員點樣履行職責係佢哋自己嘅責任，要議員自己處理，至於今日有冇改善同理唔理想，佢話依家議員應該留意到外間對佢哋嘅意見，議員會做番自己責任，又話大家有眼睇、全部係透明嘅咁話。

對於唔少議員早前被指表決法案時不在席，梁君彥話履行公職係議員嘅責任，公眾亦對議員有一定期望，希望議員日後「識做」。

被指表決參與率較低嘅議員江玉歡話剛辭任港鐵嘅法律職務，未來會投放更多時間喺議會工作。佢又感謝資深議員嘅提醒，相信議員都會自動自覺。

選委界議員黃錦輝話自己係「新丁議員」，最初會有資深議員教導佢投票同出席會議等規矩，佢亦以上堂作比喻，話自己作為老師，認為同學出席課堂係應該，如果課堂內空無一人，亦都感到唔自然。

社福界議員狄志遠就話自己出席率一向較高，只係表決時，議員可能同時處理其他公務，佢會叫秘書提醒自己，避免錯過表決。