政Whats噏：重陽山頂登高遭鄙視　蘇長榮投訴服務員態度極差

廣告都有話「今時今日咁嘅服務態度點得」，而以服務業為主要產業嘅香港過去都好強調服務態度，但唔知幾時開始，香港人嘅服務態度開始唔同咗，就連議員蘇長榮都感到畀人「鄙視嘅感覺」。

話就立法會相關事務委員會今日(30日)討論旅遊業嘅政策，蘇長榮喺會上同文化體育及旅遊局局長楊潤雄投訴，話自己上星期重陽節喺山頂「老襯亭」登高，期間同兩位服務人員傾偈，但兩次都感到「被鄙視嘅感覺」，批評服務態度極差。佢都忍唔住話以服務質素引以為傲嘅香港「點知變成咁樣」，質疑係因為香港服務業人手不足，「日頭都唔夠人手，夜繽紛邊度搵人做呢？」

楊潤雄就回覆話自己有同旅行社傾過人手點樣補充嘅，但至於零售業同其他行業，就要交畀其他政策局去幫手支援啦！