政Whats噏：輕鐵明年試用氫能列車　陳紹雄佛山試坐感覺似電車

政府近年話要大力發展氫能，成立咗氫能源跨部門工作小組，而且預計出年下半年港鐵會喺屯門試驗氫能源有軌電車，同埋配合有軌電車試驗而供應嘅氫氣。咁究竟呢個有軌電車係點運作嘅呢？議員陳紹雄早前去咗佛山市高明區考察內地首條投入商業營運嘅氫能源有軌電車。

佛山呢條有軌電車線路長約6.6公里，設10個車站、1座車輛基地同埋1個加氫站，最高運行速度為70公里每小時，每程載客量達380人。陳紹雄話試搭咗呢條線路，感覺同傳統嘅電氣化列車差唔多，但重點係唔需要任何架空供電設施，只係需要路面有兩條路軌，類似港島嘅電車冇咗架空電纜咁，行走好暢順。

而港鐵計劃喺現有嘅屯門輕鐵網絡試用呢款氫燃料有軌電池列車，以非載客形式為期6個月試驗，主要係收集營運數據。陳紹雄都話好期待項目盡快投入運作，而且唔止呢個計劃，其他好似雙層巴士、建築工地臨時供電、制氫、加氫站等嘅項目都要陸續投入試驗，要為香港打造「產、學、研、用」嘅一條龍氫能產業咁話。