政Whats噏：參觀葵青碼頭數碼化運作　議員指不及青島港

曾幾何時，香港嘅港口貨櫃吞吐量全球第一。議員黃錦輝、陸瀚民等人今日(7日)隨同立法會經濟發展事務委員會參觀葵青貨櫃碼頭，了解貨櫃碼頭最新嘅發展情況，包括技術升級同營運優化。雖然佢哋都目睹葵青碼頭如何應用新科技以提升營運效率，但相較於內地嘅青島港碼頭，仍然有段距離。

話說十多位議員參觀葵青碼頭嘅遙距操作中心，觀看操作員透過監控系統遠程起卸同堆疊貨櫃。不過黃錦輝就指地方有限，加上其他因素影響，葵青貨櫃碼頭未能盡情發揮智能科技嘅效用，同佢早前參觀嘅青島港碼頭相差甚遠。佢話青島港碼頭已經全面自動化，營運效率大為提升，不但係亞洲第一個自動化碼頭，目前更係世界排名第七大港。佢認為科技應用上，冀葵青碼頭能夠更上層樓，從而減少人手、減省成本、提升效率。

陸瀚民就指出，要提升香港港口競爭力，需要從硬件升級設施，引入自動化系統降低成本同提升營運效率，加強貨櫃碼頭嘅競爭力。