政Whats噏：叶刘再做点心姐姐　话推煎糕车要有技巧

唔少港人都锺意一盅两件，但系酒楼嘅点心车已经买少见少嘞！话说呢排经常落区嘅行政会议召集人叶刘淑仪，今朝(10日)去咗鸭脷洲西邨一间酒楼，期间竟一度“手痕”，又再做“点心姐姐”，推蒸炉点心车同煎糕车。

叶刘喺社交平台贴文，话喺呢间酒楼估唔到可碰见蒸炉点心车同煎榚车。佢话据了解，呢啲小时侯常见嘅传统点心车已逐渐被淘汰，即使剩低亦为数不多，佢都不禁试推缅怀一番。

一试之下，佢发觉同3个月前喺西区酒楼所推嘅点心车完全唔同，事关推蒸炉点心车同煎榚车需要一啲小技巧，尤其系煎糕车，假如推车时力道太猛或忽略平衡，随时会打翻车上嘅酱油同糕点食物。

叶刘话睇住酒楼姐姐推点心车工作，再次感受到佢哋嘅工作绝唔容易，仲话好高兴同几位点心姐姐交流，体会到其工作辛酸，兼且拍照留念，佢仲赞点心姐姐敬业乐群嘅精神，值得令人敬佩。

刚才都讲过，叶刘喺3个月前“客串”酒楼侍应，当时去客串嘅原因系劳动力短缺，饮食业长期唔够人，佢借机亲身了解下酒楼运作，当时佢仲手带蓝色胶手套，着埋侍应制服，推点心车送茶点畀顾客。