車Cam直擊：的哥載客半途遇劫刀行頸　空手入白刃擊退持械莽匪

空手入白刃小說睇得多，但原來現實都會出現。事緣今日(14日)網上流傳一段車Cam片，只見一名市區的士(紅的)司機載客途中遇劫，但臨危不亂地施展空手入白刃之餘，更打開車窗大聲呼救，隨後成功奪去疑似刀具反擊，行劫莽匪見勢不對立即奪門跳車逃去。但由於片段畫面質素較差，且發貼網民亦未有交代，故未能得知案發時間及地點。

從網片所見，的士後座一名戴黑色鴨舌帽、身穿黃色外套的乘客，從身後摸出一把疑似刀具物體，「行」在前座司機頸部並揚言「攞啲錢出嚟」，不過的哥遇險臨危不亂，先空手入白刃與對方爭奪刀具，口中亦破口大罵問候對方娘親，再打開車窗大聲呼救「打劫啊」。

雙方纏繞期間，的哥成功奪取刀具並疑用該刀具反擊數次，更激動地出口發洩「攞啲錢出嚟吖嗱」，行劫賊匪捱打後見勢不對，立即打開車門跳落車並大步流星地奔逃而去，司機則繼續大聲呼救，片段至此戛然而止，暫未知後事如何。