的士龍翔道掟彎甩尾連掃9米欄　網民戲言「全中」

有網民上載一條19秒長「車Cam」片，顯示於上周六(20日)凌晨3時48分，一輛空載市區的士沿龍翔道快線東行，至近黃大仙中心對開一左彎時懷疑失控，的哥嘗試扭右軚救車不果，車身連續越過中慢線，繼而猛打「白鴿轉」，車尾連掃路邊一列約9米長的膠圍欄，及後撞及斜台石壆一度擱起，最終反彈落地橫亘一巴士站對開。當時有私家車沿中線駛至，幸司機急煞未有撞向的士。

據悉，因現場早前發生交通意外，有部分紅色消防圍欄被撞毀，故暫放膠圍欄頂替，而肇事的士連環掃冧膠圍欄後，僅差咫尺便會撼撞消防圍欄，總算不幸中之大幸。惟意外發生後，的哥有否受傷及報案則不得而知。數名網民分別留言笑指「的哥差小小就可以起飛」、「全中」、「技術一流，識得搵窿捐」、「佢唔記得咗揸緊嗰架唔係 GT-R」。