黑超男駕電動單車闖元朗公路　執法部門車輛尾隨「護航」

高速公路駕駛電動單車好危險，害人又害己！網上瘋傳一條長43秒的車Cam片，顯示在昨日(7月31日)下午4時許，一輛亮起燈號的執法部門車輛，沿屯門公路往元朗公路方向行駛，剛駛過兆康站上橋時，前方一名戴上黑超、口罩、穿白衣及孭背囊的男子駕駛電動單車，沿着快線貼近分隔石壆緩緩行駛，其身旁經過的車輛見狀亦紛紛收慢車速，恐生意外。

執法部門車輛沿快線駛至，車上警員見有人駕駛電動單車，隨即將車速收慢尾隨「護送」，惟當時黑超男疑仍未發現自己犯法斷正，繼續驅車前行，影片亦至此結束。至於事件發展後續如何，網民則未有交代詳情。

有網民留言指摘黑超男，「呢啲人簡直離曬譜呀，起碼最低消費四條罪，佢呢鑊都會幾飽」、「上斜都唔洗(使)用腳踏嘅？9成9係電動單車喇！仲要踏出嚟Highway離曬譜！」、另有人戲言「唔試吓架單車嘅極限，下次點上港珠澳大橋呀？」