熊貓孖寶玩瀡滑梯　家姐反其道而爬　細佬半途而hea

港產大熊貓龍鳳胎活潑好動無時停。海洋公園昨日（8日）在大熊貓社交平台專頁發布「家姐」及「細佬」玩木製滑梯的片段，片中見「家姐」從滑梯底部努力往上爬，並表示「我要努力向上」。飼養員多次提醒「瀡滑梯唔係咁玩架！唔可以喺下面上嚟架！」，「家姐」反繼續向上爬，幾經艱辛爬了數步，但隨即滑落地。

「細佬」則沿樓梯爬上，對白稱「我就知係呢邊上去啦」，但牠上了第一級樓梯時，因未能踏上第二級樓梯而失平衡墮地，牠最終頭也不回離去。園方貼文指「家姐鍾意反其道而行，細佬就鍾意半途而hea，轉身決定去搵家姐玩，兩姊弟都唔簡單啊！」