世盃100星：一品迪斯高 處子戰風騷

對於迪斯高這名効力曼城的波斯尼亞國腳，創意爆燈的香港球迷為佢作咗句「萬般皆下品，唯有迪斯高」。當然迪斯高在球壇又真係未到至尊無上的地位，但作為協助國家隊歷史性打入世界盃的重要功臣，波斯尼亞國民應該會好認同呢句說話。

迪斯高効力德甲禾夫斯堡時踢到曉飛，幫手取得球隊史上首個德甲冠軍，之後以高價過檔由文仙尼執教的曼城，正選位置雖然坐得唔多穩，但往往後備上陣又可以建奇功，目前曼城爭標形勢大好，迪斯高隨時又會發揮功効！

球會可能並非必然正選，但迪斯高作為國家隊的星級球員，絕對交足功課，今屆歐洲區的世界盃外圍賽表現更加相當出色，取得10個入球，成為隊中首席射手，帶領波斯尼亞力壓希臘取得首名，連附加賽都唔使踢，取得巴西世界盃的出線資格，帶領波斯尼亞史上首次踢呢項國際大賽。

唔講唔知，原來迪斯高最鍾意的足球員，就係舒夫真高，都真係可以講句一山還有一山「高」喇！話時話，舒夫真高06年就幫首次打入世界盃的烏克蘭踢到入8強，迪斯高今屆世界盃處子登場，又可唔可以勁得過自己偶像呢？

迪斯高 (Edin Dzeko)

年齡：28

國籍：波斯尼亞

國家隊上陣次數/入球：60/33

位置：前鋒

球會：曼城