占仔記：直接升班有機！格雷特霍夫博「大」霧

周六晚睇完德甲煞科，周日就輪到德乙上演煞科戰，排第3位嘅格雷特霍夫要爭直接升班資格嘅話，呢晚主場迎戰辛特侯遜非勝不可，不過佢哋近兩個月贏波率偏低，冇人敢寫包單話佢哋一定贏到，玩1.47倍「入球大」先係穩陣之選。

格雷特霍夫個升班附加賽資格其實幾穩陣，是役只要唔大敗嘅話都唔會畀凱沙羅頓過頭，所以佢哋可以放開包袱狂攻，希望排第2位嘅柏達邦出事打和，咁佢哋就可以同科隆一齊直接升班。不過，格雷特霍夫呢隊波比較飄忽，上場作客炒科特布斯6球，但之前就主場輸畀1860慕尼黑，近9場聯賽只係贏得3場，實在好難觸摸。

睇番格雷特霍夫前鋒阿斯美已經連續4場聯賽有波入，要攻破辛特侯遜近5場失10球嘅防線冇咩難度，最大問題係格雷特霍夫自歇冬後每場主場賽事都有失球，今場玩「入球大」先係明智。

開賽時間：周日晚9時30分