足總盃：阿仙奴破8年宿命 入3球反勝捧盃

英格蘭足總盃決賽，阿仙奴同侯城於溫布萊球場正面交鋒，牌面高唔止一班波嘅兵工廠，領隊雲格精英盡出，派晒一眾攻擊主力上場，基奧特、普多斯基、奧斯爾同辛迪卡索拉均首發上陣。不過阿仙奴近8年無冠，一開波表現綁手綁腳，反而侯城冇壓力一開波就搶，4分鐘角球開出，雙方於門前混戰，後衞占士謝斯達搵到個波一腳抽入，侯城火速領先1比0。5分鐘後，史堤芬昆尼左路出波，侯城球員埋門一頂雖畀法比安斯基撲出，不過居迪斯戴維斯門前一射破網，侯城領先到2比0。

阿仙奴未夠10分鐘就落後2球，形勢曳到無倫，好彩16分鐘辛迪卡索拉主射罰球入網，為兵工廠追番至較接近紀錄，只係落後1球，形勢即時唔同晒。之後兵工廠完全壓住嚟打，普多斯基左路出波，奧斯爾趕到左腳一射卻射中空氣；及後普多斯基左腳遠射，中途又省中敵衞，半場阿仙奴落後1球。

換邊後阿仙奴繼續控制戰局，球隊係咁壓住侯城嚟踢，不過侯城後衞多次於自己禁區毛手毛腳犯規，球證都網開一面冇畀12碼。57分鐘，侯度史東於禁區拉基奧特，後者成份跌低，球證當睇唔到。63分鐘，積基李華摩亞於禁區犯手球，以及68分鐘辛迪卡索拉右路被勾跌，球證都不為所動，廠迷睇到肯定躁到爆。71分鐘，阿仙奴終於扳成平手，球隊開出角球，哥斯尼於中路成堆人中抽咗個波入網，追成2比2平手。

之後阿仙奴繼續狂攻，基蘭基比斯於禁區控定，左腳一抽竟然抽高氣爽，82分鐘，辛迪卡索拉左腳一抽，又被侯城門將飛身撲出，難怪雲格睇到口黑面黑。之後辛迪卡索拉於禁區畀對手從後撞跌，球證一樣冇判12碼，最終雙方90分鐘打成2比2平手，要踢加時分勝負。

加時上半場依然係阿仙奴天下，開波冇耐基奧特於禁區頭槌一鑿，可惜中楣彈出，阿仙奴認真冇運！之後艾朗藍斯右腳怒轟遠程炮，又畀麥基哥撲出，9分鐘，藍斯仔殺入禁區右腳勁射，但又僅中網側。加時上半場雙方冇波入，仲係打成2比2。

加時下半場，19分鐘，艾朗藍斯接應基奧特後抽靚助攻，禁區頂一腳抽入，阿仙奴終於反超前3比2，於驚濤駭浪下連入3球反勝侯城，繼2005年奪取足總盃後再一次奪標，雲格可以放下心頭大石，而阿迷亦終於可以開心勁慶祝。