世盃mode：金田一都諗唔明 黑巫術點幫巴西

巴西4強對德國，尼馬傷出，堤亞高施華停賽，點算好？有睇漫畫《金田一》的朋友應該都對「黑魔術殺人事件」有印象，有個巴西巫術大師就有樣學樣，呢個叫Sillman的大師用黑巫術，向德國球員「落咒」。

Sillman用一個足球場形狀的四方盒作法，點燃蠟燭放入去，然後周圍係著對方球衣的巫術公仔。「我將它們當成對方主力，綁住它們的腿，令班球員無辦法在場上跑動。」Sillman仲特別點名提到曉姆斯、湯馬士梅拿同紐亞，明顯覺得呢三個係巴西入決賽的最大阻力！

到底Sillman的黑巫術得唔得先？佢就大晒今屆戰績，指住4個巫術公仔，話呢4個代表克羅地亞、墨西哥、喀麥隆同智利的核心球員，而巴西就一直晉級到依家，講到自己好似好醒！

不過上場佢就未能成功施法，阻止哥倫比亞的「J神」入波，更無法阻止尼馬的受傷，今場對德國賽前，就有報道指被佢「落咒」的幾名德國球員都感冒未清，唔通巴西今次真係要再靠巫術大師？