英超Fever：迪基亞神救！紅魔驚險兩連勝

早場曼聯主場迎戰愛華頓，紅魔雖有朗尼停賽，但以代隊長尹佩斯及「老虎」法卡奧為首嘅鋒線一樣咁勁，不過最弗始終係迪馬利亞，27分鐘「天使」接應桑馬達嘅橫傳，起「生蟲」右腳一針見血領先1比0。

之後呢位當選上月曼聯最佳球員嘅翼鋒再妙射罰球彎過人牆，好彩愛軍門將侯活冇瞌眼瞓飛身救出。完半場前愛華頓右閘希拔殺入禁區被勞基梳爾侵犯博到12碼，可惜巴尼斯操刀遭曼聯門神迪基亞捉晒路擋出，錯失良機。

不過大難不死嘅紅魔卻未瞓醒，55分鐘愛華頓罪人巴尼斯將功補過，妙傳無人看管嘅賴史密夫頂入扳平，好彩7分鐘後迪馬利亞起左腳勁轟，禁區內嘅法卡奧突然加多腳成2比1，呢球亦係「老虎」加盟曼聯後嘅首個士哥，完場前愛華頓連番攻勢，但奧士尼和白賴仁奧維度的埋門，都先後被神勇的迪基亞撲出，最終曼聯有驚無險擸晒3分，取得聯賽兩連勝。