英超Fever：死忤逆仔！艾迪巴約趕阿媽出街

多哥射手艾迪巴約今季喺熱刺踢到不知所謂，最近甚至連正選位置都不保。或者打擊太大，近日艾迪巴約疑似患上被害妄想症，佢畀屋企人大爆趕阿媽出街，搞到老人家要周街賣膠袋同鎖頭維生後，竟然話阿媽搵巫師作法咒佢收山，先至會做忤逆仔喎，係真唔係呀？

幾年前艾迪巴約話自己15歲就開始踢波搵錢，目的係改善屋企人生活，報答媽咪養育之恩。不過當艾巴迪約能夠搵大錢，似乎變成另一個故仔，佢家姐瑪格麗特大爆，阿媽一年前畀細佬趕出屋企，依家要喺多哥同加納交界擺地攤，靠賣膠袋同鎖頭度日，有仔等於冇仔。

瑪格麗特咁講：「媽咪已經成年冇見過細佬，而且佢連電話都唔接。其實媽咪唔係問佢拎錢，只係好想見自己個仔。」只不過艾迪巴約就唔係咁諗，佢話阿媽係自己離開大屋，唔係佢趕扯，仲話阿媽、家姐同細妹搵巫師咒佢收山踢唔到波添，所以唔想再同佢哋扯上關係喎！

「我唔係牧師，對抗唔到巫術。如果你阿媽周圍同人講，你好快會收山，你點同佢保持聯絡？我覺得屋企人最好講少啲嘢，停止搵巫師搞我。仲有，我好難想像家姐用我個名租屋，又唔話我知囉！」睇嚟艾迪巴約遇上職業生涯低潮，想賴晒屋企人，唔知佢第日事業好轉，會唔會諗番起阿媽呢？