東網Campus:波牛絕迹 流浪專收大學生

20150204
東網電視
更多新聞短片

昔日街場波牛在時代變遷中漸告消失,本地波「青訓搖籃」標準流浪近年在街場再無法找到新球員,反而踩入校園有新發現。新一代流浪青訓產品又出爐,今期新秀冇晒波牛,取而代之係高學歷貴公子,當中包括已獲大學提前取錄的中學尖子、大學畢業生,仲有個準律師。有咗呢班校園新兵加入,流浪成隊波形象當堂升呢!

「鳳凰計劃」規定港超球會必須成立青年梯隊,但組織青年軍唔係你話搵就搵到,今時今日街場波牛絕迹,各隊組隊都會與區隊或足球學校合作,甚至直接踩入校園在學界賽事物色球員,前年當選足球先生的黃洋就係來港讀書踢大學隊期間被傑志發掘,成為職業球員並入選港隊,而現時多位現役球員例如太陽飛馬陳柏衡同葉頌朗,都係大學生球員。

多年來在街場及地區尋找新血的流浪,近年轉移陣地到學界賽事揀蟀有一定收獲,多位高學歷球員準備在球圈闖蕩,其中前男拔萃隊長、現就讀理大1年級的黃子恩,已獲安排由流浪轉會南區,協助該隊升班準備來季征戰港超聯,其餘幾位新秀,亦會於今季下半季適當時候獲流浪安排上陣。

眾新兵當中,前鋒郭彥騰與門將周朗僖均已大學畢業,郭彥騰更是流學英國的法律系畢業生,有律師唔做走嚟踢波,他表示希望一圓自己的足球夢:「其實我去英國留學之前入選過香港青年軍,為學業被逼放棄踢波,依家讀完書,家人亦唔反對我追尋夢想。」

吳擎天是英華書院中六生,今年要考中學文憑試,不過近日已收到城大的取錄信,可以放心踢波;至於港德混血兒韋健豪在喇沙書院畢業後現就讀理大副學士,他表示:「家人都全力支持我入踢足球,父親更希望我可以去德國落班。」