港超聯 元洋士哥!女粉絲食腸狂賀

20150314
東網電視
更多新聞短片
嘩!食洋腸~~~~~(元洋 Yuan Yang 點點滴滴Facebook圖片)

究竟邊位係天行元朗人氣最勁嘅男神?唔係「港腳級」嘅隊長鄭璟昊、都唔係擁有「國際球迷會」嘅型男中堅趙俊傑、更加唔係自命生得似C朗嘅靚仔蘇沙……而係嚟自大連嘅中場元洋呀!
人稱「YY」嘅元洋唔算超級靚仔,踢過太陽飛馬嘅佢嚟到元朗亦都未穩佔到正選位置,不過佢擁有好似陽光咁溫暖嘅笑容,身材又夠高大,的確冧死唔少妹妹粉絲,唔怪得除咗有球迷幫佢喺Facebook開咗個專頁,最近仲成日喺觀眾席同場外見到「男神」嘅巨型Banner同易拉架,鬼死咁有架勢啦!
叻豬嘅「YY」喺星期六(3月14日)入波幫元朗1比1逼和黃大仙,見到偶像大踢爭氣波,看台上面嘅粉絲即時尖叫聲不絕,班「洋粉」賽後仲向偶像送上一早準備好,印咗「元洋入波了」嘅打氣球衣,真係好Warm呀!有位女粉絲為咗慶祝「元洋BB」入波,特登去咗食腸仔慶祝,仲打趣話係食「洋腸」……點都好啦,偶像入波,係值得賀一賀佢嘅。
元洋出場機會唔多,但人氣咁堅揪,當然唔止因為高大靚仔啦,佢仲趁住3月14日呢個「白色情人節」向球迷派禮物,每個「YY禮物包」都有枝糖同埋一對波衫印章,保證「洋粉」食完甜到入心!元洋,你係得嘅!