【是咁體的】一個變性英雄的傳奇家族...
20150608
東網電視
更多新聞短片
贏過奧運金牌、做過國家英雄、參演過電視電影...如果你覺得都係好普通，咁我如果話埋畀你知，呢位金牌選手Caitlyn Jenner，65歲之齡變性呢？恐怕要形容佢，只能用上「傳奇」兩個字！估唔到佢運動員生涯多話題，就算去到65歲，都依然成為話題人物，上埋雜誌封面，認真架勢！其實寥寥幾十字，只係呢個傳奇英雄的冰山一角，更加傳奇嘅係佢錯綜複雜、千絲萬縷家庭背景！呢一切一切，就要從Caitlyn贏得奧運十項全能金牌開始講起...
＊ Caitlyn Jenner
今次要介紹嘅主角原名叫Bruce Jenner，佢喺76年蒙特利爾奧運贏得男子十項全能金牌後，從此命運改寫，事關呢面金牌對「冷戰時期」嘅美國好緊要，尤其在於能將強敵蘇聯打低，絕對係為國爭光，頓成國家英雄！
其後佢有參與過幕前演出，可惜演技並不討好，更成「金草莓」最爛男主角。但講到佢最大心願，都係希望做女人，曾經服用激素類藥物，後來遇上真愛Kris，試過停止服用，但內心依然好掙扎。
Jenner最後雖然同Kris育有兩個囡，但最後都決定離婚，選擇做番真我，今年6月正式變性，登上《Vanity Fair》雜誌封面，宣布從此改名叫Caitlyn，開展人生新一頁。
＊ Kristen Mary Houghton (Kris)
前妻Kris未嫁俾Caitlyn之前有一段婚姻，跟前夫兼律師Robert有四名仔女，最著名要數真人騷女星Kim Kardashian，同變性金牌英雄Caitlyn亦有兩個囡囡。其私人生活相當惹爭議，先後跟Robert同Caitlyn有過兩段婚姻，同時被指曾與涉及殺妻震驚全國的前美式足球明星辛普森（O.J Simpson）有染！
＊ Robert Kardashian (已故)
Kris前夫律師，周旋於Kris和前美式足球明星辛普森的「三角關係」，但90年代仍為辛普森在殺妻案辯護，最後辛普森更獲判無罪。
＊ 辛普森（O.J Simpson）
前美式足球明星，雖然從轟動全球嘅殺妻案脫罪，但08年卻因另一宗搶劫、綁架案被判刑九年，11年更親自承認自衞殺死前妻及其男友，有美國小報踢爆佢入獄後不停寫情信畀Kris，揚言有好多對方嘅把柄在手，想點呀！
＜Caitlyn和Kris的親生女兒＞
＊ Kendall Jenner (19歲)
曾跟「加國小天王」Justin Bieber傳緋聞，Kendall上載男女床戰的火辣照片後，呢段緋聞更愈煲愈熱，更有指Kendall母親對Justin Bieber好滿意，但最近又被踢爆撻著一級方程式車手咸美頓，齊齊出海玩！
＊ Kylie Jenner (17歲)
Kendall細妹未夠18歲，為人已經相當開放，不時於社交網絡放sexy相，又露下半球又露腰，被批評過於性感。
＜Robert和Kris的兒女＞
(以前叫Caitlyn做「繼父」，依家就要改口叫「繼母」)
＊ Kourtney Kardashian (36歲)
卡戴珊家族的大家姐，真人騷佢都有份演出
＊ Kim Kardashian (34歲)
幾姐弟以佢最有知名度，出位行徑多到數唔晒，最經典莫過於同NBA球員堪富利斯（Kris Humphries）結婚72日後離婚！目前跟饒舌歌手老公Kanye West非常恩愛，最近更宣布成功「造人」，繼兩年前生完女兒露芙（North West）後再度懷孕。
＊ Khloé Kardashian (30歲)
同家姐Kim一樣鍾情籃球員，跟奧當為兩公婆，但早前因奧當偷食搞過離婚，但疑似手續太煩又hold住唔離婚，更被指戲劇玩復合，真係唔知想點！Khloe亦被指其真正父親唔係律師Robert，而係辛普森！
＊ Rob Kardashian (28歲)
卡戴珊家族最細男丁，算係成個家族最唔特別喇！
講到口水都乾，假如你都係覺得呢個家族唔夠傳奇，咁真係無話可說喇！