英超Fever：肥仔福音！曼聯推4XL新衫！

肥仔們！你哋係咪有逼爆波衫嘅煩腦？咁真係建議你撐曼聯喇，起碼買到啱身嘅戰衣嘛！為迎合全球各位肥仔球迷嘅需求，「紅魔鬼」喺15至16季度首度製造4XL(4加大)球衣，初步預計於8月或9月喺奧脫福球場試推，如果反應理想，咁就會納入常規生產嘅尺碼，正呀喂，肥仔有衫著喇！

現時普遍英超球會最大都係出到3XL尺碼，車路士、曼城、利物浦同阿仙奴頂盡都係得3XL，喂！肥仔唔啱著喎！而熱刺就醒喇，佢哋仲勁過曼聯，新季出到5XL波衫，紐卡素都有4XL球衣推出，唔知會唔會吸引到班肥仔球迷入貨呢？不過，英格蘭國家隊最大只得2XL波衫提供，歧視肥仔，搞錯呀！