【港足接班人】CowSir：胡晉銘係新陳偉豪

今季「恒地青少年聯賽（U18甲組聯賽)」冠軍太陽飛馬，周日（21日）揮軍小西灣球場，喺「足總盃」決賽再同標準流浪鍊過，除咗要力爭「雙冠王」呢個榮譽之外，亦係陣中兩名「準港超腳」，分別司職中堅嘅胡晉銘，同埋後上前鋒嘅陳柏熹，喺廣大本地波「粉絲」面前「騷哥利」嘅良機！大家啱啱撐完大港腳，梗係唔好畀佢停，撐埋本地波嘅新一代啦！

太陽飛馬U18力爭「雙冠王」

太陽飛馬U18喺聯賽表現出色，最終以18勝15勝2和1負得47分，壓倒傑志同標準流浪兩大勁敵封王，呢個冠軍亦係太陽國際體育會推行青訓計劃，派各梯隊參與足總賽事以嚟，第一個11人賽事嘅冠軍，假如可以捧埋「足總盃」做埋「雙冠王」，就真係認真威水喇！身為太陽國際體育會總監嘅陳志康（CowSir），賽前就提醒一班足球小將，不要予自己太大壓力，最緊要係臨陣盡情發揮。

雖然太陽飛馬易主，但太陽飛馬U18嘅球員亦不愁出路，就好似胡晉銘同陳柏熹兩個咁，據可靠消息講已經有港超球會睇中咗佢兩個，喺踢完呢場「足總盃」決賽之後，就會完成相關嘅轉會手續。

睇on.cc直播睇「新陳偉豪」「徐德帥2.0」

「恒地青少年聯賽足總盃」U15、U16同U18嘅三場決賽，將會喺on.cc直播，各位熱愛本地波、支持香港隊嘅朋友，將有機會睇到呢兩位「準港超腳」嘅演出，想對佢兩個有啲初步認識先？聽吓CowSir點講。「胡晉銘司職中堅，佢防守力強，控球能力亦好高，佢場上頭腦冷靜，有啲似陳偉豪，至於會唔會有『偉豪』嘅成就，就要佢繼續努力啦！」至於曾到過曼聯學法嘅陳柏熹，CowSir就話佢踢法喺港超聯好少有，仲話：「陳柏熹本身擁有高速，好有侵略性，個人能力好高，好多方面都好平均，呢類球員喺港超聯比較少有，但我覺得佢係徐德帥嘅類型。」

一個係「新陳偉豪」、一個係「徐德帥2.0」，最後一次披起太陽飛馬嘅波衫爭冠軍，點可以唔為佢哋打氣呀？嚟緊嘅星期日，下晝2點45分，on.cc約定大家啦！