港超聯 打不死「小強」精神黃耀富

20151110
東網電視
更多新聞短片
嘩!

「有邊個人唔係貪慕虛榮?足球都要有Noise先有人留意!」元朗後衞黃耀富這兩句話擲地有聲,一如他的潮Look打扮般出位!離開香港球圈輾轉再回歸,34歲的「富仔」敢言作風不改,效法偶像G Dragon的打不死「小強」精神,向後輩傳承足球理念,把握時光綻放餘暉。

被譏矮仔 激發上進心

Cap帽、黑超、長頸鏈,縱然沒有G Dragon報稱的1.77米身高,外號「Fu Dragon」的黃耀富在鎂光燈下猶像漆黑中的螢火蟲,同樣專業:「其實足球同演藝事業好似,只不過藝人在舞台表演,我們就在球場上演出,同樣是要娛樂觀眾。」從16歲港甲出道便被取笑為「矮仔」、「侏儒」,幾多難聽說話也聽過,今日換上「Fu Dragon」式潮Look造型,偶爾與好友陳偉豪在facebook上針鋒相對,有人說他浮誇自大,更多卻是換來球迷派Like。

「足球要有Noise先有人留意,我又唔係做衰嘢,衰嘢就話唔知醜啫!如果有人留意,叫你男神又好,笑你矮又好,咪認咗佢囉,做球員如果唔畀人鬧得不如唔好做!好彩我都有班阿叔支持,鼓勵叫我繼續踢落去,你話如果係學生妹就好咯!」「富仔」說來鏗鏘有力,能在港超屹立不倒16年,卻絕非「靠把聲」。昔日自知身高不足便苦練頭槌,就連首席鋼門葉鴻輝亦曾被他頂破大門,即使退居後備亦從無怨言:「唔夠好波咪冇得踢,有乜好呻!我34歲仍然踢得,年輕球員應該反省自己是否付出足夠努力,能否跑得快過老鬼?」

幫過卓卓擦鞋

回想出道初年曾為卓卓擦鞋,與陳偉豪從界限街「推車仔」運送裝備到九龍仔練波,因為捱過苦,才更懂珍惜:「細個做0靚仔邊會有錢?賺錢是為咗生活,但當生活足夠應用便不可忘本,要堅持番自己理念。」運輸、珠寶Sales.....為生活,富仔曾打過15份工,去季初離開流浪後轉踢澳門業餘聯賽,出場費每場5至6千元,卻始終難捨足球情意結。

「踢波始終有人留意,點會唔留戀。不過同演員最大分別係遊戲規則要你到某個時候就要停,呢個道理我明白,所以今季我同元朗簽下半季合約,一方面幫助小將成長,一方面保持狀態出戰5人賽。」即使他朝引退,現已是5人青年隊教練的富仔,仍盼將不服輸精神繼續承傳:「我同『小強』一樣打不死!」


為青訓出力 助谷5人足球

雖已踏入職業生涯黃昏,卻因5人足球重燃熱情,黃耀富今日出發往內地備戰「亞洲5人足球錦標賽東亞區預賽」。同樣需要硬碰中國,相比起港足備受注目,5人隊卻無乜人理。「富仔」對此未感氣餒,惟盼將發揚5人足球,協助青訓發展。

近年熱心5人足球發展的富仔加盟元朗,其一原因是透過高水平訓練,備戰即將展開的亞洲賽。雖然港足熱潮未有惠及5人隊,但富仔深信5人足球具發展潛力:「香港球隊普遍控球指數不高,球員身材輸蝕,卻崇尚英超式快速長傳踢法。5人足球十分注重細節,有助球員從小鍛鍊技術。」

願為元朗賣力

富仔今夏曾帶隊到泰超春武里學法,他表示當地5人聯賽受歡程度不遜於11人足球。他日會否執掌教鞭,亦取決於5人足球的推廣發展,元朗教練馮凱文,正是他的學習對象:「『大頭文』不時將5人足球的戰術運用及技術細節用於11人賽中,與我的理念非常相似。在我加盟元朗的過程中他幫了我好多。若是下半季需要我,我會留隊。」