「神投球」地上最強最正棒球索女誕生

日本史上最強最正女棒球員稻村亞美，今年因為拍咗個「神擊球」廣告，著住OL超短裙同高踭鞋喺商場外面打全疊打，一夜爆紅成為網絡新女神，而且佢唔止擊球掂，投球時速仲有98公里嘅女子職業級數，4個月前佢嘅「神投球」片段，點擊已超過100萬，19歲有樣有身材唔睇係你損失囉。

稻村亞美身高1米73，受到兩個哥哥影響，小學1年級開始打棒球，佢喺初中3年間係學校硬式棒球隊成員，擅長位置係投手同一疊手，所以佢加入藝能界後，事務所將佢包裝成最強最正女棒球員，吸納大叔同宅男粉絲，無敵笑容加索爆身材邊有得輸吖？

4個月前亞美出席業餘棒球賽事開球禮，投球時速提升到98公里，達到女子職業級數，搞到啲大叔同宅男粉絲當正佢係棒球女神，結果段片喺網絡瘋傳，點擊超過100萬，亞美仲話要進行日本職棒全攻略，去勻各個球場主持開球禮添，人氣梗係瘋狂爆升啦！