港超聯　傑志精神領袖「波記」管足25年

傑志近5季狂掃9項主要錦標，王朝之下教練團、球員換了又換，唯獨球隊管理員李永波，無論日曬或雨淋、身處石門或吉蘭丹，每日搬運裝備的身影仍長伴左右，在不同球隊擔任同一職務25年，「波記」深得球員、教練、球迷，甚至管理層尊重，不少外援離港多年仍銘記這位慈祥、充滿智慧的老先生。多年前曾風光過的「波記」，最終未有隨家人定居加拿大，回流追尋簡樸生活，更希望在視如自己家庭的傑志「做到做唔到為止」，繼續隨軍走過高山低谷。

李永波這位「元祖級」管理員以前從事運貨工作，40多歲時曾隨家人移居加拿大，卻因不適應當地生活回流，自小愛睇香港足球的他，91年在朋友介紹下到快譯通工作，之後服務花花再到現今的傑志，同一崗位，一做就逾25年；「波記」講起多年來與球員建立的情誼，仍津津樂道：「球員差唔多個個都Friend，快譯通嘅愛華士好波又靚仔！我最鍾意李安納，佢仲會教我點訓練小朋友，人好，技術又好……列文到依家仲會打電話畀我！」對於教練的特別習慣，他亦瞭如指掌：「郭家明每日都要一箱橙，唔知點解日日都要食橙。」

「波記」工時不算長，工作卻不輕鬆，每日無論風雨場地，都要在背後撐起球隊運作，亦經常隨隊遠赴海外作賽，70歲的他無論體能或心態上依然遊刃有餘，笑言極喜歡工作的他，更稱「每到休季就想搵兼職」。享受工作，除因已習慣每日返工、到相熟的「鍾記」吃飯、回家照顧孫兒、早睡早起的簡單生活，亦因視傑志上下為家人：「除太太、子女及孫兒外，香港無乜親人，傑志好似屋企人咁，日日都見住班大細馬騮（指球員），成班都好好玩！」

自言「左右腳都得」的「波記」偶爾騷球技，在球圈浸淫多年亦有獨眼光，對新球員的評價準繩，對於球員失誤更是一針見血，雖然他堅持不在乎贏輸，但被球迷戲稱「傑志總軍師」的他，講到某些比賽仍難掩喜怒：「好似今季對（夢想）駿其嗰場，場地已經難踢，不過係唔夠人打，輸就輸啦！銀牌（上季決賽）對東方就唔同，輸得條氣唔順……最高興就係上季贏東方4比0嗰次，一打完嗰下，無形中興奮出晒嚟！」賽後與球員牽手慶祝時，「波記」開心得雙眼發光，彷如小球迷，對球隊的感情亦不言而喻，無論傑志是多年前的中遊球隊、或是上季的「三冠王」，「波記」肯定繼續默默相隨：「做到自己認為唔做得，或者老闆唔再請我為止！」