霍斌仁殺到歐洲！港將投羅馬尼亞球隊

又多一個香港球員到歐洲搵食喇！前標準流浪、港青中堅霍斌仁，剛於社交網宣布好消息，佢已由中超上海申花，借到去羅馬尼亞乙組球隊A.S.C Berceni，希望呢位21歲中堅，可以喺歐洲發光發熱啦！

霍斌仁踢中堅位置，本身係香港、尼日利亞混血兒，2012年出道踢過3場港甲，之後到英國學藝。2年前轉投申花，不過因為球隊人才濟濟，只係喺預備組出過場。今次佢得到A.S.C Berceni賞識，可以到歐洲踢波，只要攞到工作證就可以出場，佢當然笑到四萬咁口啦，希望你喺當地打出名堂，為香港增光！