【3.24撐港隊】港隊敗陣 冇吹12碼成關鍵!

20160325
東網電視
更多新聞短片
(電視截圖)

香港隊在世盃外圍賽最後一輪賽事作客卡塔爾,最終以0比2見負,以14分結束今次世盃之旅。港隊今仗正選兩位土生華將門將葉鴻輝及後衞李志豪披甲,首次入選的羅拔圖及羅素亦正選登場,其餘球員計有法圖斯、聶凌峰、黃洋、積施利、保連奴、辛祖及麥基。

港隊部署先求穩守,但未能抵擋對方猛烈攻勢,特別是對方左翼法拉拿速度技術兼備,頻頻硬爆積施利出波,戰至20分鐘,法拉拿左路傳中,卡塔爾隊長艾哈度斯12碼點附近勁射破網,港隊落後0比1,其後卡塔爾繼續搶攻,幸好港隊力保不失,半場落後0比1返入更衣室。

下半場港隊以艾力士及高梵入替聶凌峰及麥基實行同對方鍊過,果然搶返唔少攻勢,仲幾乎追和添!60分鐘,辛祖在進攻左路禁區內扭波準備落底線,被對方後衞穆薩掃跌,慢鏡可見對方明顯中腳唔中波,但球證冇畀12碼,港隊錯失扳平機會,真係唔抵!

下半場65分鐘卡塔爾有個必入攻門,進攻中場洛迪高田畑門前扭過門將葉鴻輝,擺定左腳近門勁射,竟然中柱唔入。不過卡塔爾始終實力較高,戰至86分鐘,施巴斯甸射破葉鴻輝十指關,卡塔爾贏到2比0,最終港隊亦以兩球見負,退居小組第3位。