他一直在玩命 「飛鼠之神」撞石慘死
20160822
東網電視
更多新聞短片
飛鼠之神放上網嘅最後圖片。（互聯網圖片）
飛鼠裝滑翔運動，被公認為全球最危險極限運動；而近年不斷挑戰高難度、喺業界享負盛名嘅意大利29歲運動員伊曼紐爾（Uli Emanuele），日前就命喪於多洛米蒂山脈。呢個山脈高達3100公足高，伊曼紐爾着上飛鼠裝跳落山頭，但就因為開唔切降落傘，令佢狂撞岩石斃命。每次佢做呢項極限運動，頭上都戴上鏡頭儀器，捕捉飛行刺激瞬間；但呢次慘成死亡之旅，Fans就要求唔好公開影片，免得令佢家人更加傷心。
相比起跳降落傘，飛鼠裝滑翔運動更加危險，呢一種人體飛行項目，使用一種特殊跳傘裝備，稱之為飛鼠裝，參加者由極高嘅山頭縱身跳下，利用氣流於天空飛行，身上完全冇安全設備，只係靠運動員本身技術，於天空打開降落傘着陸，聽落已經牙煙，所以目前全球僅有約600名飛鼠裝運動員。喺瑞士勞特布龍嫩，過去就有28名運動員過身，係全球死亡率最高運動。但伊曼紐爾一向視飛鼠裝滑翔係佢嘅生命，不斷向難度挑戰，而每次佢嘅玩命飛行，於網上都引起好大迴響，就好似今次附上嘅片段，就睇到佢每次飛行都係在玩命。
本月17號，佢挑戰家鄉嘅多洛米蒂山脈，之前佢喺Facebook update status：「晚上8點，3100公尺高嘅多洛米蒂山脈，準備要開始一個新跳躍」估唔到成為佢嘅遺言。佢過身後，Fans都好難過，懇請有關方面唔好公開死亡片段。而飛鼠裝滑翔運動協會，亦發公開信悼念伊曼紐爾。希望呢位飛鼠之神可以安息。
SO東波同你追實體壇每個精彩時刻！