【奧蘇設計】波王枱堅吸睛　佢哋都變小粉絲

由香港頂尖桌球手陳偉明一手策劃嘅「東亞桌球中心」尋日起試業，邀請到大批嘉賓到九龍城廣場一試身價34萬嘅「火箭枱」，演藝界桌球高手包括郭富城、張智霖、陳百祥、彭健新、葉智強、吳岱融、吳卓羲、衛志豪、打過職業賽嘅電影人張展鵬齊到賀，場面熱鬧。

一眾藝人喺中心內大展身手，城城話一向熱愛打枱波，以往多數去南華會，而Chilam就係學生時期已經熱愛桌球，難怪技藝不凡。城城話打波嘅好處係，可以令個人好專注同集中，如果唔經常練，就算今日打得好，聽日都未必打得番一樣水準。Chilam就話，打枱波係個好健康嘅運動，佢仲好鍾意「君子之爭」嘅感覺添。

至於老前輩「叻哥」同彭健新，就細數當年情，話佢哋60年代已開始出沒波樓，由兩蚊一個鐘打起，但當年嘅桌球室環境同設施都差得遠，仲畀人品流複雜嘅感覺，不過依家桌球已經變咗紳士運動。佢哋話當年甚至因為唔夠位出cue要用特製短cue打波，當然無法同今日連傅家俊都喺度練波嘅「東亞桌球中心」相比。

一眾嘉賓都大讚中心設施同間格，陳偉明表示目前中心只係試業中，稍後會等佢嘅一班職業桌球名將朋友，包括杜赫迪同傅家俊等抽空來港主持開幕至正式開業。

東網體育同你追實體壇每個精彩時刻！　

http://bit.ly/2ecTF2A