「香港蛙后」江忞懿憑初心戰勝絕望

大部分人都喜歡一帆風順的人生，卻愛聽起落跌宕的故事，「香港蛙后」江忞懿（Yvette）正是這則引人入勝故事的主角。今年是Yvette代表香港出賽第10年，經歷了6年低潮期的她一度退役，最終憑「初心」取得奧運入場券。雖然沒有站在奧運頒獎台上，但她對游泳的熱愛與堅持絕對不輸他人。

現年23歲、有「香港蛙后」之稱的游泳健將江忞懿，13歲開始代表香港出戰游泳賽事，是香港多項游泳紀錄保持者。3歲習泳的Yvette，6歲已胸懷大志，夢想是征戰奧運，最終有幸出戰里約奧運圓夢。

運動員可能是最殘酷的職業，有云「台上一分鐘，台下十年功」，Yvette在賽場上以31.15秒做出50米蛙泳香港紀錄，練習場上要付出多少分鐘？她說：「每星期練習30小時，一日約6小時。」一年練習93,600分鐘，就是為了完成不足1分鐘的比賽。除了刻苦練習，最要命的是比賽中沒有最好，只有更好，今天刷新了新紀錄，下個目標就是要突破它，無休止挑戰自己的極限，然而卻永不知道下次突破是甚麼時候，又或者已到達個人極限，Yvette坦言曾面對長達6年的樽頸位：「由16歲至22歲，我嘅游水成績一直冇進步，當時好懊惱，我已經比以前勤力，但時間反而倒退，試過好多唔同方法、唔同技術練習，甚至改變飲食同生活習慣，但都冇用，當時情緒好低落，最後決定退役。」

正能量激發潛力

不過，「勿忘初心」令Yvette在退役3個月後重返泳壇，並取得今屆奧運入場券，她憶述：「我喺退役後1個月發現自己真係好鍾意游水，諗起細個游水毫無雜念，純粹為鍾意而做，加上奧運亦係我未完成嘅夢想。」她自省以前過分着重成績，遂將焦點由名次轉到心態上：「學會接受同放開自己控制唔到嘅事，盡力做已經無悔，明白到成績以外仲有其他更有意思嘅事，例如人生經驗、回憶、友誼，學懂感恩身邊人同事，個人開心咗，多咗正能量，成績反而慢慢進步。」

好學不倦尚未言退

經此一役，她深信只要不放棄，成功就在轉角，掙扎期間自以為徒勞無功的練習，其實亦是一種鍛煉與累積：「其實最大得着未必係時間上突破，而係個人成長，令我變成一個更加成熟同堅強嘅人，我有信心面對生活上其他困難。一直以嚟好多人問我為游水犧牲咗啲乜，我從來冇咁諗過，反而覺得游水帶畀我好多。我去咗好多地方，結識唔同嘅人，令我成為更加快樂、成熟同有善心嘅人，感恩游水好迂迴曲折咁塑造咗現在嘅我。」

Yvette在泳壇未言休，並以2018年亞運及2020年東京奧運為目標，對於退役後的計劃，她坦言：「我未必會從事同游泳有關嘅工作，因為我幾鍾意研究唔同嘅嘢，比較好學，想嘗試唔同範疇，例如我鍾意攝影，亦有意重返校園進修。」

體壇臥虎藏龍 讚歐鎧淳美而精

近年不少運動員都備受品牌垂青，樣子標致的Yvette亦不例外，早前應首飾品牌Just Gold鎮金店邀請示範全新系列首飾。常以運動造型示人的她演繹起來別有一番成熟女人味，她認為首飾可以帶來一種溫文爾雅的氛圍：「我鍾意簡單、含蓄、藏而不露嘅設計，平時會戴珍珠耳環，至於比較有紀念價值嘅首飾，係今屆出戰奧運前媽咪送畀我嘅一條奧運五環頸鏈。」

對於運動員明星化，深受宅男與品牌歡迎的Yvette清楚知道自己的定位是運動員，至於別人如何標籤自己，她則不太在意：「無論我將來做乜，做真我、做番自己就可以。」問到可有意入娛樂圈？她自言性格內斂，暫時未有此想法，但樂於挑戰不同範疇：「只要係正面同正途嘅嘢都會試，冇需要規範自己，目前想嘗試多啲唔同範疇，知道自己鍾意啲乜先再決定。我希望可以回饋社會，為社會添加正能量。」

網民經常將Yvette與另一靚女泳手歐鎧淳作比較，Yvette表示沒有多想這個問題，又大讚歐鎧淳：「佢係實至名歸，成績驕人而且靚女，又能推動體壇，做持旗手當之無愧，我好戥佢高興。其實泳壇同體壇有好多值得欣賞嘅人才，我希望任何努力嘅人都可以百花齊放，作為運動員最重要係有體育精神，識英雄重英雄，同埋要鼓勵下一代。」她自認有爭強好勝之心，惟同時清楚成敗並非人生所有，運動場上要超越的並非別人，而是自己。

給十年前、十年後的我

人生有幾多個10年？10年前，Yvette代表香港參賽，10年後的今天，她繼續在這條路上奮鬥，下個10年仍是未知之數，但相信經歷最終會成為最美麗的風景。勿忘初心，方得始終。

Yvette給10年前的自己一番話：「未來嘅路未必容易行，經歷嘅掙扎及重重難關表面上好辛苦、好灰，但佢係一個成長機會，你好好把握同面對難關，將會有一個更好嘅自己。」

她亦給10年後的自己一番話：「我希望你依然充滿好奇心，可以多方面嘗試同實踐自己，我知道自己要求高，所以提醒你要做真我，做到自己最好嘅就足夠，已經係成功。」

場地：紅磡都會海逸酒店

服裝：Ted Baker

化妝：Wing Cheng