NBA總結：皮雅斯遺憾告別綠軍主場

東網電視

皮雅斯喺開賽前親吻中圈嘅塞爾特人隊徵。

快艇喺NBA作客以102:107不敵塞爾特人，遭遇2連敗。雖然快艇教練李華士好識做，安排退役前最後1次重返塞爾特人主場嘅皮雅斯打正選，可惜佢全場得5分鐘落場時間，只能夠喺完場前射入1球3分，遺憾告別綠軍主場。

18年前皮雅斯首次喺塞爾特人主場作戰，正選上陣攻入19分，今次佢重返綠軍主場，一如賽前承諾，開賽前跪低親吻中圈嘅塞爾特人隊徵，除咗現場有佢綠軍生涯嘅MV播放，球迷仲大嗌佢嘅綽號「Truth」(真理)，歡迎球會英雄退役前最後1次回歸。

事實上，皮雅斯都表現得好激動，佢喺比賽初段打咗一陣坐低，期間被電視鏡頭捕捉到，佢喺後備席上喊到雙眼通紅，而且完場前20秒，快艇教練李華士見大勢已去再派皮雅斯落場，結果佢喺湯馬士面前射入3分，贏得全場掌聲。

其餘球員方面，格芬盡晒力有23分、8個籃板同4次助攻，但由於隊友基斯保羅因傷缺陣，佢始終幫唔到快艇贏波。另一方面，湯馬士有28分、2個籃板同8次助攻，即使3分11投得3中，依然帶領塞爾特人取得7連勝，繼續顯示實力。

同日，雷霆喺主場以105:99擊敗拓荒者，韋斯布克取得42分、4個籃板同8次助攻，包括完場前1分18秒射入關鍵3分，同時個人今季第8次得分40＋，追平火箭嘅占士夏登，開季至今有8次得分40＋嘅數據，帶領雷霆連贏2場。

最新賽果(左方主場)

籃網 95:103 速龍

塞爾特人 107:102 快艇

雷霆 105:99 拓荒者

東網體育同你追實體壇每個精彩時刻！　

想撐本地波？即Like我撐本地波Facebook專頁

on.cc東網