歐聯 拿度砌低馬納當拿 皇馬反勝形勢好
20170216
東網電視
更多新聞短片
今晨上演嘅歐聯16強大戰首回合，由皇馬主場迎戰拿玻里，雙方今場都有個巨星級粉絲入場打氣，結果身為「銀河艦隊」鐵粉嘅網球天王拿度，似乎較好腳頭，最終喺落力打氣下，帶挈皇馬以3比1反勝有阿根廷傳奇球王馬納當拿捧場嘅拿玻里，晉級前景樂觀。
雙方今場合演快上快落嘅精彩對攻戰，拿玻里開賽8分鐘就有恩斯治尼接應隊友咸錫妙傳，把握主隊門將基羅拿華斯失位，輕鬆喺離門25碼熨入領先。皇馬喺19分鐘就由賓施馬近門頭槌扳平。換邊後「銀河艦隊」再憑卻奧斯與卡斯米路接連施展百步穿楊妙射，將紀錄改寫成3比1到完場，有望連續7屆至少打入8強。
東網體育同你追實體壇每個精彩時刻！