【有片】巴舒亚伊冇脚好波畀车仔巴打耻笑
车路士近日同足球游戏《FIFA 17》拍宣传片，一班车仔球员齐齐玩技术大挑战。今战玩射桶，考考佢哋嘅传球精度。两队分别系比利时队同世界队，比利时队有门神泰拔高图尔斯、中前场夏萨特同巴舒亚伊，至于世界队就有中场查洛巴、尼高路简迪、后卫葛特苏马。
玩法好简单，双方射中个桶就有分，目标愈远愈细，而分数亦会更高。咪以为比利时队有夏萨特就赢硬，因为后备前锋巴舒亚伊唔多掂，唔知系咪斗鸡眼发作，第一脚就大挞偏离目标，唔止对手笑佢，就连夏萨特都耻笑埋一份，仲问喺场边观战嘅中坚大卫雷斯，想唔想入嚟换走巴舒仔。
比利时有个咁大只黑脚，最后梗系世界队赢到离行离列啦！就连高图尔斯之后都话：“我哋输在有条废柴喺度。”巴舒亚伊仲好意思问：“Me？”之后就唔好意思咁掩住块面。镜头仲影到，雷斯最后忍唔住踢番脚，结果点？自己睇片啦！
东网体育同你追实体坛每个精彩时刻！