【恭喜晒】騎師天王蘇銘倫再做老竇

一向深受馬迷愛戴嘅萬人迷騎師蘇銘倫，繼上月底喺杜拜世界盃賽日憑「波斯小村」、「轟雷暴雪」分別勝出杜拜金盃同埋阿聯酋打吡兩項大賽後，日前又有好消息傳出，就係又做老竇喇！

現年35歲嘅蘇銘倫，與太太兼法國小姐Sophie Thalmann於06年在巴黎結婚後，育有一仔一女，大女叫做Charlie，兒子叫做Mika。日前Sophie再為蘇銘倫誕下兒子Robin，BB重近七磅，而且樣子非常趣致精靈，又似足爸爸，兼且達成佢哋希望擁有三個小孩的心願，難怪蘇銘倫非常開心啦。話時話，蘇銘倫父親Jean-Marc係一名跳欄騎師，蘇銘倫就更加唔使講，貴為法國騎師七大天王之一，咁第時Robin大個咗，會唔會又係另一位世界級騎師呢？