甲一聯賽 認住佢!飛鷹新外援「阿E」

20170429
東網電視
更多新聞短片

本地籃球甲一聯賽日前經已開鑼,嚟緊周二(5月2日)將會上演被視為「四哥大戰」的重頭戲,由飛鷹火併福建,今場波特別注目,除咗勝負關乎聯賽四強之爭,飛鷹更有位新中鋒、身高2米05的居港美國球員韋利斯(Emanuel Willis)初次亮相,為咗方便,全隊都叫佢做「阿E」,去球場見到佢,大家都可以咁叫佢。

「阿E」今年32歲,來香港已經一年,一直跟住球隊齋練波,終於等到辦妥註冊手續可以上陣,「阿E」就話:「我很喜歡香港這個城市,所以一年前決定來這個地方落腳,並打算在這裏開展籃球事業,幫助球隊爭取成績,經過一年等待,終於有機會落場比賽,我希望盡快打響名堂,讓球迷記得我。」

講起「阿E」來歷,佢曾參加09年NBA選秀,同屆球星計有格芬、占士夏登同史提芬居里,「阿E」並未選上,同年佢去咗丹麥球會落班,之後足迹走遍歐亞美洲大半個地球,來港前在日本比賽,可以話見慣世面,至於妻子同一對年幼兒女目前留在美國生活,自己一個來香港打天下。

對於新季甲一聯賽,「阿E」坦言好清楚飛鷹的定位:「香港籃壇有Big3球會,南華、永倫同東方龍獅主導賽事,但飛鷹亦有能力做得更好,我會盡我所能,不會令支持者失望。」