【不斷更新】閃電入兩粒　雲格英超首贏寸王

20170507
  • 東網電視
    更多新聞短片
    即上英超刨績王：http://win.on.cc/epl　
    英超接近尾聲，歐聯入場券爭奪戰白熱化，「4哥」利物浦主場鬥修咸頓，雖然「修頓」冇嘢好爭，但佢哋堪稱豬頭骨，紅軍近4次對住佢哋都贏唔到，又睇吓今日乜嘢環境。
    至於尾場就係話題戰，阿仙奴鬥曼聯。兩軍多年嚟鬥餐飽，兩軍領隊雲格同莫連奴亦係歡喜冤家，成日隔空鬥咀，真係未開波先興奮。紅魔鬼傷兵滿營，寸王話要兼顧歐霸，今仗果然出副選，用杜安斯比踢右閘。
    【0049】全場完　阿仙奴2比0曼聯
    仙魔大戰，雲格終於打破魔咒，於英超首贏寸王，之前兩名領隊喺英超碰頭，雲格只得5負7和，12次都未贏過，今仗有歐霸後顧嘅莫連奴用19歲小將安斯比擔正右閘。雖然比賽初段兩軍互有攻守，但去到下半場，曼聯後防突然「崩盤」，被阿仙奴於55分鐘及57分鐘連入兩球贏波。兵工廠全取3分後，爭前4仍未絕望。
    【0037】曼聯攞番啲攻勢，朗尼有多次埋門，81分鐘呢腳最接近，禁區頂右腳腳內側敞射，僅僅於門楣高出。
    【0027】失咗兩球之後，曼聯後防繼續風聲鶴唳，奧斯爾左路發難傳中，A山門前慢一步，皮球掠門而過，否則可以整多粒。
    【0018】 莫連奴換入拉舒福特頂替靴里拉，搵福仔加強攻力。
    【0012】 阿仙奴2:0
    有冇咁快呀！？啱啱入完2分鐘，曼聯後防犯錯，被阿仙奴逼甩，韋碧克57分鐘接應阿歷士張伯倫右路傳中頂成2比0。
    【0010】 阿仙奴1:0
    55分鐘，格列沙加禁區外起腳，省中靴里拉背脊，皮球突然高飛曲墮，笠死迪基亞，曼聯球迷肯定眼火爆！
    【0000】 下半場開波，同大家望吓足智彩「下一隊入球」即場賠率，阿仙奴1.94倍、曼聯2.65倍、無入球係4.20倍，睇嚟操盤手睇好兵工廠多啲喎！
    【2346】半場完　阿仙奴0比0曼聯
    雖然同早場利修戰一樣，半場都係0比0，但仙魔大戰過程好唔同，兵工廠同紅魔鬼搏拳味濃，雖然曼聯有8個位置同周中歐霸盃完全唔同人選，但比賽初段佔到優勢，製造多次驚險鏡頭，阿仙奴幸有施治守住最後一關幸保不失。阿仙奴企穩陣腳後多番攻勢，A山、韋碧克、艾朗藍斯都有攻門，全被表現勇猛嘅迪基亞瓦解。
    【2330】雙方都有入波機會！艾朗籃斯右路發難，底線傳中，韋碧克快射被擋出。轉過頭皮球已經去到兵工廠後場，朗尼趁對方犯錯截到皮球，禁區內趟射，被施治拍出。
    【2327】今場雙方都用盡兩邊底線，所以角球都不少，27分鐘兵工廠同曼聯都有4個，話咁快角球總數已經8個。控球率係42%比58%，曼聯佔優。
    【2309】搏拳！阿仙奴阿歷斯山齊士直線交畀艾朗藍斯，又係第一時間施射，被迪基亞擋出。
    【2305】朗尼直線交入禁區，馬迪爾第一時間撞射，被施治撲出底線。
    【2255】仲有5分鐘開波，又係時候報吓足智彩賠率。阿仙奴主W1.92倍、和波3.45倍、曼聯W3.3倍。讓球盤阿仙奴讓平半，兵工廠上盤1.78倍、下盤2.08倍。
    【2220】 全場完 利物浦0:0修咸頓
    利物浦主場對修咸頓即使有古天奴復出，但修咸頓擺大巴陣死守，占士米拿12碼又唔入，加上修咸頓門將費沙科士打「上晒身」，紅軍只能取得1分，連埋今仗，近5仗對修咸頓未贏過，搞到爭前4主動權又減少啲。
    【2210】 阿仙奴曼聯有陣
    紅魔鬼領隊莫連奴果然出副選，傷兵滿營嘅後防，畀19歲小朋友杜安斯比首次正選上陣，前面就用安東尼馬迪爾。
    阿仙奴
    門將：施治
    後衞：洛賀丁、哥斯尼、蒙利爾
    中場：阿歷士張伯倫、格列沙加、艾朗藍斯、基蘭基比斯
    前鋒：奧斯爾、韋碧克、阿歷斯山齊士
    曼聯
    門將：迪基亞
    後衞：杜安斯比、基斯史摩寧、菲爾鍾斯、達美安
    中場：米希達利恩、安達靴里、拉桑馬達、卡域克、朗尼
    前鋒：安東尼馬迪爾
    【2205】 法明奴禁區頂呃過一個後，左腳射過外彎波，又被修咸頓門將費沙科士打一個表演機會。3分鐘後史杜列治近門快射，又畀費沙科士打接實。
    【2156】 利物浦領隊高普下半場24分鐘一口氣換兩個，由史杜列治入替奧歷治、拉爾拉拿入替盧卡斯。
    【2151】 12碼唔入！
    下半19分鐘，修咸頓後衞積克史堤芬斯禁區犯手球，占士米拿主射12碼被費沙科士打救出。
    【2147】 下半場15分鐘修咸頓換人。列特文入替保法爾。
    【2115】 半場0比0
    唔好意思，遲咗更新，小記悶到瞓咗一陣。紅軍半場只能同修咸頓踢成0比0，雖然利物浦圍攻「修頓」，但都只係掛靴搔癢，不論菲臘比古天奴定係羅拔圖法明奴嘅射門，都係禁區外起腳，輕易被對方門沒收。如果下半場唔改善，一個唔覺意畀修咸頓一個突擊得手，就真係喊都無謂。
    【2103】法明奴半場攞到波，長駒直進扭到去禁區頂射地波，可惜冇乜力，費沙科士打瞓低一抱入懷。
    【2053】踢咗23分鐘，終於有腳似樣睇吓！復出嘅古天奴禁區頂中路起腳，但太正被對方門將費沙科士打沒收。
    【2047】暫時利物浦控球佔優，控球率58%，組織攻勢大多集中於進攻左路，但埋門機會唔多。
    【2038】開波8分鐘，兩邊都冇乜入肉攻勢，射門都未見過。
    【2025】仲有5分鐘開波，報吓足智彩賠率先。利物浦W 1.45倍、和波4.1倍、修咸頓W 5.5倍，讓球盤利物浦讓一球，利物浦1.95倍、修頓1.89倍。
    【1955】有陣
    利物浦有好消息，菲臘比古天奴復出，呢名巴西兵可以令紅軍進攻更為立體及快速，睇嚟今仗領隊高普3分志在必得。
    利物浦
    門將：米洛列特
    後衞：占士米拿、祖爾麥迪比、洛夫雲、尼達利基尼
    中場：盧卡斯、韋拿杜姆、安利簡恩
    前鋒：羅拔圖法明奴、奧歷治、菲臘比古天奴
    修咸頓
    門將：費沙科士打
    後衞：賴恩貝特蘭、吉田麻也、積克史堤芬斯、薛迪索拉斯
    中場：禾特普斯、史提芬戴維斯、杜辛泰迪治、奧里奧爾羅美奧、保法爾
    前鋒：加比亞甸尼