【有片】兩腳12碼！馬列斯宴客益曼城

即睇馬列斯超騎呢「兩腳12碼」：http://bit.ly/2rcB6zZ　

今晚英超頭場藍月亮曼城主場以2比1擊敗李斯特城，以2分力壓周日晚先有比賽嘅利物浦，升上聯賽榜第3位，對取得來屆歐聯入場券又行近一步。李斯特城今仗原本有機會搶番一分，可惜上屆英格蘭球員先生馬列斯主射12碼燒鬚被判犯規，加上曼城首個入球亦有越位嫌疑，李城輸波真係唔好彩。

李斯特城今仗冇咗一對正選中堅賀夫及韋斯摩根，上半場大部分時間被曼城圍攻，29分鐘，曼城由利萊辛尼喺左路發難傳中，大衞施華遠柱接應第一時間撞射入網，雖然李斯特城球員投訴門前處於越位位置嘅史達寧有舉腳，但球證判入球有效。7分鐘後，利萊辛尼賓再次殺入禁區被賓拿盧安尼掃跌，球證直指12碼，「耶穌仔」加比爾捷西斯操刀射成2比0。狐狸完半場前由岡崎慎司禁區內接應馬克艾拜頓左路傳中，第一時間左腳射入靚波追成1比2。

換邊後狐狸積極反撲，結果去到下半場32分鐘搵到絕佳追平機會，馬列斯禁區邊被基捷基治踢跌，球證直指12碼，可惜馬列斯自己操刀「跣」腳，被指觸球2次，就算射入亦被球證判無效，仲要冇得重射，結果曼城保住2比1勝果完場，以36戰72分壓過70分嘅利物浦升上第3位。

即上英超刨績王：http://win.on.cc/epl　

東網體育同你追實體壇每個精彩時刻！

http://bit.ly/2ecTF2A