【紀念卡域克】卡佬不枉此生：多謝費Sir！

卡域克紀念賽精華片段：http://bit.ly/2rGXsMV　

於奧脫福面對超過7萬球迷，卡域克話不枉此生！今年35歲嘅曼聯中場卡域克，於當地時間6月4日，於紅魔鬼主場踢紀念賽，多名球會經典人物傑斯、史高斯、雲達沙、尼曼查維迪、朗尼等都有撐場，聯同泰利、施多夫、羅比堅尼、文迪達、加歷查等進行表演賽。今仗卡域克射入靚波，為曼聯08隊扳成2:2完場。賽後卡域克話，於下季會盡力替曼聯爭取錦標，並衷心多謝親自收購佢到曼聯嘅恩師費格遜。

雖然卡域克仲有一年約並未離開曼聯，不過球會今夏率先為佢搞紀念賽，以道謝呢名前英格蘭國腳11年嘅貢獻。今仗全場球迷對卡域克勁熱情，令佢踢得份外好落力，雖然對手卡域克明星隊，憑華倫西亞前隊長文迪達，以及羅比堅尼入波兩度領先，但曼聯08隊先憑尼曼查維迪扳平，到球賽尾段，卡域克於禁區外射個割草式靚波中柱彈入，全場掌聲雷動，最終雙方和氣收場。

卡域克賽後，先為早前曼市恐襲死難者致哀，跟手就到佢嘅感言：「雖然奧脫福每個星期都爆滿，但估唔到大家對我咁熱情，面對超過7萬名球迷入場，我真係好感動。來季係我最後一季，我會同其他球員，盡力為大家爭取錦標。」佢特別多謝費格遜：「好感謝費Sir當日收購我，等我有機會成為曼聯一份子。所有人都知佢有幾偉大，以及對曼聯嘅貢獻，佢對我嘅職業生涯真係有好大影響，所以一定要再三多謝你，波士。」

於韋斯咸及熱刺成名後，卡域克於06年，以1860萬鎊轉投曼聯，繼承堅尼嘅16號波衫。之後11年，卡域克為紅魔於英超上陣314次射入17球，被廣泛認為其實力屢被低估，佢多年來為曼聯嘅貢獻，係值得更多尊重及注意。

【有片】朗尼真心渣　連加歷查都過唔到：http://bit.ly/2rqBkpb　

【有片】明玩嘢！加歷查怒鏟加利佬：http://bit.ly/2qNKz0g　

即上英超刨績王：http://win.on.cc/epl　

東網體育同你追實體壇每個精彩時刻！　

http://bit.ly/2ecTF2A