【港超放暑假】迪高返巴西同未婚妻行善
20170623
東網電視
更多新聞短片
迪高善心爆棚。(互聯網圖片)
效力東方龍獅嘅防守中場迪高，場上踢法勇悍，場外善心爆棚！
話前迪高喺球季之後，已經同未婚妻返番巴西放暑假，放假之餘亦不忘行善，探望患病嘅3歲小朋友Lucca，仲拍咗片放上facebook，希望喚起更多人嘅關注。
聽迪高講，Lucca喺6個月大嗰陣被確診患有非常罕見嘅脊髓性肌肉萎縮症(Spinal Muscular Atrophy,簡稱SMA)，除咗運動神經退化造成肌肉無力，無法如常活動，仲會影響呼吸，要靠儀器協助，嚴重嘅仲會有生命危險。
Lucca來自巴西貧困家庭，佢嘅病需要一種美國特效藥協助治療，當中涉及龐大醫療費用。雖然抗病過程十分艱苦，但係Lucca同佢嘅屋企人從來冇放棄過，唔少巴西人知道Lucca病情同困境亦紛紛伸出援手。好似迪高咁，佢除咗捐錢畀Lucca之外，亦特別送上佢嘅東方龍獅3號波衫，希望Lucca康復長大後，可以好似其他小朋友咁喺球場上自由奔馳，享受足球樂。
球場上硬朗勇猛嘅迪高喺探望Lucca時盡顯鐵漢柔情，向來低調嘅佢十分希望可以喚醒更多巴西、甚至係其他國家嘅人對SMA呢種疾病嘅關注，幫助Lucca同其他有需要嘅小朋友。
東網體育同你追實體壇每個精彩時刻！
想撐本地波？即Like我撐本地波Facebook專頁