港超聯 介紹番!香港飛馬隊長陳肇麒

20170728
東網電視
更多新聞短片

香港飛馬周五(28日)於京士柏運動場正式開操,球隊大軍包括新加盟的外援紛紛亮相。

新季將由楊正光執教的香港飛馬,球隊人腳調動亦算不少,新兵除了早前已落實的艾華、梁諾恆、梁興傑以及羅曉聰外,亦公布其餘3位新援為前俄乙保加利亞中堅羅斯、去季於塞浦路斯搵食的前西丙西班牙中場迪比和去季在馬其頓甲組聯賽在射手榜取得第2位的塞爾維亞前鋒伊高,至於球隊舊援除利馬外,基斯贊、沙華、艾華度以及迪亞高等人因踢法不適合球隊而不獲續用。

球隊亦同時宣布,上季由「陳7」搖身一變「陳18」的陳肇麒,來季將重披7號戰衣,更獲委任為香港飛馬隊長,而黃俊皓及胡晉銘則出任副隊長。

對7號情有獨鍾的陳肇麒,在7號球衣前主人迪亞高離隊後,「陳18」主動向球會要求7號球衣。多年來都選擇7號作為球衣號碼,陳肇麒認為7號有好運:「多年來,7號都帶俾自己好多運氣,好多成就都係着上7號時所獲得。」不過「陳7」仍以球隊為先:「其實球衣號碼並唔重要,自己出道時都係18號,反而最重要係球隊能夠配合。」

新球季擔任球會隊長,「陳7」肩負重任:「球會希望我帶領隊中如林樂勤、蕭俊銘等年輕小將成長,畢竟球會對佢哋好大期望。」「陳7」仲話:「做咗隊長攞正牌與球證拗數。」問及多年來一直是球壇風雲人物的「陳7」,擔任隊長會否擔心球迷批評,他表示:「都咁多年,怕咩呀,唔會怕任何嘢。」

香港飛馬將於8月7日至19日期間前往泰國清邁和曼谷集訓,屆時將會與春武里、武里南、泰軍以及其他當地球隊進行熱身賽。

香港飛馬17-18職球員名單
領隊:文彼得
主教練:楊正光
技術顧問:奇雲邦特
助教:陳浩然、黃梓豐
體能教練:朱偉霖
守門員教練:范俊業

門將:梁興傑*、袁皓俊、高俊
後衛:楊賜麟、梁諾恆*、黃俊皓、方栢倫、李毅凱^、張志勇、羅斯*
中場:麥保美、利馬、蕭俊銘、林樂勤、羅曉聰*、迪比*、周穎軒 、胡晉銘
前鋒:陳肇麒、梁嘉恆、艾華*、鍾偉強、伊高*

*為新加盟球員
^從傑志續借