【不斷更新】謝斯做英雄 阿仙奴輸波慘爆
20170819
東網電視
更多新聞短片
英超周六一堆賽事，頭炮先有曼聯作客4比0擊敗史雲斯，依家就有利物浦對水晶宮，尾場仲有阿仙奴作客史篤城。咁多好波，你又點可以錯過？
【02:23】【全場完】史篤城 1:0 阿仙奴
PSG借將謝斯洛迪古斯，英超處子戰就有料到，帶領史篤城爆冷爆廠！今仗阿仙奴表現不俗，前場幾個主力勁有活力，奧斯爾、張伯倫、艾朗藍斯等個個對辨，可惜面對發揮超水準嘅史篤城，始終未能破關。下半場謝斯策動攻勢，之後接應比拉希奴妙傳入楔禁區射咗個波入網，成為贏波功臣。兵工廠雖然換入基奧特、禾確特同伊禾比，搞到主隊門前風聲鶴唳，仲有拿卡錫迪入波被枉判越位。於補時銀河唯一禁區內頂斜，未能再做救廠英雄，阿仙奴最後要擺低3分。
【02:05】
78分鐘，兵工廠換走拿卡錫迪同格列沙加，換入禾確特同伊禾比
【02:00】
72分鐘，拿卡錫迪禁區勁射爆網，以為兵工廠扳成平手，點知被判越位在先。睇慢鏡拿卡錫迪同敵衞平排，咁樣食鋪詐胡激唔抵！
【01:53】
千呼萬喚，66分鐘銀河唯一基奧特後備換入救廠！
【01:48】
比拉希奴禁區勁頂睇怕入硬，點知遇着施治神救，阿仙奴幾乎輸多粒！
【01:45】
阿仙奴左路高波放入禁區，韋碧克空晒升起，點知得膊頭頂到個波，越楣而去；跟手藍斯於禁區內射波又中龍，都係過唔到畢蘭特
【01:34】史篤城 1:0 阿仙奴
謝斯處子戰即入波！呢個好波之人，47分鐘於中場中策動，畀比拉希奴後自己殺入禁區，比拉希奴畀番佢勁靚，謝斯第一時間左腳射咗個波入網，叻仔呀！
【半場完】史篤城 0:0 阿仙奴
上半場雙方快打快，雖然冇波入但戰情堅可觀。阿仙奴奧斯爾、艾朗藍斯、張伯倫、韋碧克全民皆攻，兵工廠不斷畀靚高波入禁區，畀後上球員入楔，搞到主隊後防風聲鶴唳，好彩畢蘭特醒目先未失波。主隊新將謝斯洛迪古斯亦Sharp醒，曾試過以一敵三殺入禁區傳中，但隊友又唔生性射唔入，半場窿窿。
【01:04】
格列沙加嚟個遠射似樣，可惜角度太正被沒收
【00:54】
史篤城少咗個扭得之人！沙基利傷出，換入比拉希奴
【00:49】
兵工廠中前場踢得水銀瀉地，多次插入禁區都好有威脅；主隊謝斯仔狀態一流，力敵3個後衞一樣入到禁區，可惜祖普莫亭接應一射冇力，嘥料！
【00:41】
雙方快上快落好睇喎，11分鐘阿仙奴右路SET個波入門前，派達斯隻手掂到個波，但球證冇畀12碼阿仙奴
【00:30】開波喇！
【00:20】
仲有10分鐘史篤城對阿仙奴開波，陣容出咗之後，雖然史篤城有謝斯洛迪古斯擔任正選，保贊先踢後備，而阿仙奴則有梅斯達菲復出，足智彩主客和賠率並無變化。史篤城主W4.25倍、和波3.65倍、客W1.66倍。
【23:52】全場完 利物浦1:0水晶宮
紅軍取得今季首場勝仗，憑沙迪奧文尼帶點幸運成份嘅入波擊敗水晶宮，為下周歐聯次回合對賀芬咸注下強心針。今場沙拿先作後備，但紅軍冇佢始終欠咁啲，最終佢下半場15分鐘入替，利物浦成隊醒晒，高普撳掣搞掂。
【23:40】 阿仙奴有陣
史篤城正選陣容
門將：1 畢蘭特
後衛：6 葛特蘇馬、17 梳爾哥斯、20 謝夫甘馬倫
中場：18 馬美迪奧夫、4 祖阿倫、24 費查、3 派達斯
前鋒：22 梳頓沙基利、11 謝斯洛迪古斯、10 祖普莫亭
阿仙奴正選陣容
門將：33 施治
後衛：20 梅斯達菲、18 蒙利爾、31 哥拉辛拿斯
中場：24 比利連、8 艾朗藍斯、29 格拉沙加、15 阿歷士張伯倫
前鋒：11 奧斯爾、9 拿卡錫迪、23 韋碧克
【23:29】利物浦1:0水晶宮
沙迪奧文尼左路推進，跌跌碰碰殺入禁區，皮球撞到對方守衛去番佢腳下，文尼面對水晶宮門將軒尼斯輕鬆射入。
【23:17】
下半場15分鐘，利物浦領隊高普作出調動，調走今仗冇乜貢獻嘅史杜列治，換入「埃及美斯」穆罕默德沙拿。
【23:00】
下半場開波喇，紅軍上半場控球比率70%、5射3中，水晶宮控球比率30%、2射1中，現時足智彩「下一隊入球」賠率：利物浦1.39倍、無入球5.00倍、水晶宮4.70倍。「主客和」賠率利物浦W1.48倍、和波3.15倍、水晶宮W8.50。
【22:51】 其他英超半場賽果
般尼茅夫 0:0 屈福特
般尼 0:0 西布朗
李斯特城 1:0 白禮頓
修咸頓 2:1 韋斯咸
【22:47】 半場完 利物浦0:0水晶宮
有歐聯後顧嘅紅軍，收起穆罕默德沙拿，改用史杜列治，但威脅明顯不足，占士米拿於中場雖然活躍，但殺入禁區機會不多。利物浦最具威脅係上半場35分鐘，短角球開出，安德魯羅拔臣斬入小禁區，但接應嘅沙迪奧文尼撻Q，水晶宮進攻亦只係隔靴搔癢，雙方半場互交白券。
【22:38】
水晶宮中場賓捷安禁區角狂轟，好彩米洛列特封晒位擋出，但擋完個波成個人都彈起企唔穩，可想而知個波幾勁！
【22:35】
利物浦進攻左路開出角球，沙迪奧文尼於小禁區內接應，諗住用腳內檔射，點知皮球跌落大脾，搞到3碼撻Q。
【22:24】
上半場踢咗半場，主場嘅利物浦佔咗64%控球率，但入肉埋門唔算多。
【22:10】
利物浦首個中龍攻門，占士米拿左路發難，於小禁區邊起腳，被對方門將軒尼斯沒收。
【22:00】
利物浦對水晶宮開波，賽前雙方為巴塞隆拿恐襲默哀。
【21:20】全場完 史雲斯0:4曼聯
紅魔鬼又派4蛋益街坊！周六(19日)晚英超早場，曼聯憑中堅艾歷拜利「鐵樹開花」，取得職業生涯首個聯賽入球，打紀錄後，更於80至84分鐘上演「閃擊」好戲，由盧卡古、保羅普巴及安東尼馬迪爾各建1功，作客大炒史雲斯4:0，開季後2戰2勝，狂轟入8球。
【21:18】利物浦有陣
由於要應付下周歐聯外圍賽次回合對賀芬咸，利物浦再作出多個轉變，最特別係用史杜列治攻堅，收起「埃及美斯」穆罕默德沙拿。
利物浦正選陣容
門將：22 米洛列特
後衛：12 祖高美斯、17 卡拉雲、32 祖爾麥迪比、26 安德魯羅拔臣
中場：14 佐敦軒達臣、7 占士米拿、5 韋拿杜姆
前鋒：19 沙迪奧文尼、15 史杜列治、9 羅拔圖法明奴
水晶宮正選陣容
門將：13 軒尼斯
後衛：24 科素文沙、6 史葛丹恩、5 湯堅斯
中場：2 祖爾禾特、4 米利禾積域、42 賓捷安、3雲安荷特
進攻中場：10安祖斯唐辛、8 羅夫度斯卓克
前鋒：17 賓迪基
【21:11】史雲斯0:4曼聯
畀我抖吓得唔得，呢頭收筆嗰頭又入，後備入替嘅馬迪爾射成4:0。
【21:07】史雲斯0:3曼聯
曼聯2分鐘連入兩球，盧卡古先於80分鐘射入成2:0，點知史雲斯一開波，又被曼聯搶走製造攻門，保羅普巴82分鐘再入多一粒，兩球都係米希達利恩做助攻。
【21:00】
戴利白蘭特禁區頂搏到罰球，保羅普巴主射，可惜越楣而過。
【20:48】
史雲斯搶回攻勢，湯卡路爾於左路禁區邊傳中，譚美阿巴謙接應，可惜頭槌攻門頂高。
【20:37】
下半場開波接戰，曼聯有少許優勢，下一隊入球賠率：史雲斯4.4倍、無入球3.75倍、曼聯1.57倍。
【20:15】 半場完 史雲斯0:1曼聯
曼聯臨完半場搞掂，保羅普巴接應左路角球頭槌攻門，被法比安斯基撲到中楣彈出，艾歷拜利衝前補中，助曼聯入更衣室前領先「天鵝」1:0
【20:06】
拉舒福特中路突破，推過幾名史雲斯球員，單刀面對門將法比安斯基竟然輕力挑高被沒收。
【19:53】
上半場踢咗一半，雙方搏槌，但都係地面進攻為主，暫時未有角球，角球大細中位數7.5球，角球大1.76倍、角球細1.96倍。
【19:40】曼聯中楣
桑馬達左路罰球開出，菲爾鍾斯頭槌攻門中楣，一人一次，中楣打和！
【19:32】史雲斯中楣
佐敦阿休左路快放落到接近底線，右腳腳面彈向龍門，皮球中楣彈出，曼聯死過翻生。
【19:20】
仲有10分鐘開波，曼聯客W、讓球客勝同讓1/1.5球上盤全面落飛，客W由1.3倍跌到1.27倍，讓球客勝由1.96倍跌到1.87倍，上盤由1.82倍變1.74倍。
【18:45】史雲斯 對 曼聯
曼聯英超首戰贏波，今仗用番沿有班低，繼續三箭頭米希達利恩、盧卡古拍拉舒福特強攻史雲斯。
史雲斯正選陣容
門將：1 法比安斯基
後衛：16 馬田奧臣、26 基爾洛頓、33 費達歷高費南迪斯、6 艾菲莫臣、27 基爾巴特利
中場：14 湯卡路爾、51 洛基美沙、8 利萊費亞
前鋒：18 佐敦阿休、10 譚美阿巴謙
曼聯正選陣容
門將：1 迪基亞
後衛：25 路爾斯華倫西亞、4 菲爾鍾斯、3 艾歷拜利、17 戴利白蘭特
中場：6 保羅普巴、31 尼曼查馬迪、8 桑馬達
前鋒：22 米希達利恩、9 盧卡古、19 拉舒福特