【歐聯大預言】雙紅穩陣！干地累死車仔？

即上英超刨績王：http://win.on.cc/epl　

歐聯分組賽剛完成抽籤，英超今屆有5支球隊參賽，其中「雙紅」曼聯與利物浦，分別避開巴塞、皇馬、拜仁、祖雲達斯等列強，並同樣遇上狀態一般嘅俄超球隊，要出線16強問題不大。熱刺撞正皇馬及多蒙特陷死亡H組固然難踢，但車路士一樣會遇上麻煩，馬體會預料將成小組冠軍，如領隊干地未能改善其歐聯戰績，最後分組賽出局亦不足為奇！

A組：賓菲加、曼聯、巴素利、莫斯科中央陸軍

上季勇奪歐霸盃嘅曼聯，重返歐聯有個好開始，只遇上頭號種籽賓菲加，巴素利及中央陸軍亦只不過係泛泛之輩。曼聯今夏買入盧卡古、尼曼查馬迪及域陀連迪路夫等，伊巴謙莫域更重新加入球隊，實力絕對係A組之冠。賓菲加雖仍係葡超最佳球隊，但賣走尼爾遜施美度、艾達臣摩拉斯及域陀連迪路夫後，防守力肯定大幅減弱。中央陸軍後防亦長期積弱，門將艾堅菲夫失波如食生菜。巴素利傳奇中場馬迪亞斯迪加度退休影響甚深，小組包尾都似。

曼聯預測排名：第1名

C組：車路士、馬體會、羅馬、卡拉巴克

馬體會近年於歐聯成績一流，過去4年曾2次殺入決賽，教練施蒙尼功不可沒。雖然球隊於今夏被罰未能買人，但一眾主力如佐治高基、沙奧尼古斯、恩歷克卡拉斯高仍在陣中，基士文更加屬世界級射手。車路士於牌面上，絕對不下馬體會，但球隊今夏無故放走尼曼查馬迪，又與王牌射手迪亞高哥斯達反面，巨星夏薩特又長傷，車仔要爭好成績存極不穩因素。翻查干地帶領祖雲達斯歐聯成績，13年不敵拜仁8強出局，翌年更羞家地落後於加拉塔沙雷，只得第3名黯然出局，羅馬絕非善類，車仔陰溝翻船絕不奇怪。

車路士預測排名：第3名

E組：莫斯科斯巴達、西維爾、利物浦、馬里博爾

利物浦今夏簽入穆罕默德沙拿、蘇蘭基及安德魯羅拔臣，雖然當中冇大牌球星，但沙拿好使好用，極速融入球隊，同沙迪奧文尼及羅拔圖法明奴組成三叉戟攻力極強，若最後成功留住菲臘比古天奴，戰鬥力將更強，但防線不濟或會導致無端失分。西維爾近年頻繁更換教練，而且今夏幾名收購如捷西斯拿華斯，整體實力並未有增強，今次再遇紅軍，未必如16年歐霸盃決賽般有甜頭。莫斯科斯巴達上季半爆冷勇奪俄超冠軍，不過本季表現未如理想，目前只排11，教練卡利拉甚至帥位不保。馬里博爾一向屬歐聯魚腩，之前12場分組賽只勝1場，球隊最佳球員達利華錫不再續約，令球隊弱上加弱。

利物浦預測排名：第2名

F組：薩克達、拿玻里、曼城、飛燕諾

曼城今夏斥巨資超過2億鎊組軍，重新打造一條後防線，再配合加比爾捷西斯、阿古路、奇雲迪布尼、史達寧及貝拿度施華，陣容非常豪華，領隊哥迪奧拿經過一季適應期，預料曼城本屆有飛躍表現。拿玻里鋒線實力不俗，恩斯治尼、梅頓斯、咸錫極具卡士，但踢小組攻擊足球，或被曼城恰死。薩克達上季以13分差距取得烏克蘭聯賽冠軍，不過近年於歐洲賽威力已大打折扣。飛燕諾於雲邦賀斯麾下，上季爆冷奪荷甲冠軍，但主力古積特已退休，干高路及 卡斯杜柏已分別轉投摩納哥和羅馬。

曼城預測排名：第1名

H組：皇馬、多蒙特、熱刺、尼科西亞

皇馬上屆歷史性成功衞冕歐聯冠軍，陣中所謂二線球員愈踢愈成熟，艾斯高、馬高阿辛斯奧戰鬥力不容忽視，卡斯米路更成世界級防中，如果C朗保持水準，銀河艦隊依然係奪標大熱。H組被視為死亡之組，但皇馬鶴立雞群可謂穩奪出線權，尼科西亞不成氣候，餘下一個出線席位將由熱刺、多蒙特爭奪。睇牌面多蒙特秤先，不過蜜蜂兵團今季搵前阿積士教練保斯執教，發揮未必及得上杜曹；大熟大勇嘅奧士文尼迪比利又已同球隊反面，多蒙特不穩定因素比熱刺更多。熱刺上屆歐聯爆冷小組出局，今次被爭晉級被睇低一線，反而令球隊壓力減少，加上球隊得以保持上季主力陣容，哈利卡尼、迪利亞里質素一流，若球隊能於溫布萊球場打出水準，有力晉級。

熱刺預測排名：第2名

東網體育同你追實體壇每個精彩時刻！　

http://bit.ly/2ecTF2A