【不斷更新】兩後備建功 曼聯贏李城2比0
20170826
東網電視
更多新聞短片
即上英超刨績王：http://win.on.cc/epl
又到周末，英超今晚繼續連場惡戰，《東網》將會全晚為大家直擊幾場焦點大戰戰況，其中打頭陣先由般尼茅夫主場鬥曼城，10點場則會跟進「神奇球隊」哈特斯菲爾德能否砌低修咸頓，締造3連勝再上「一哥」位。至於深夜尾場則有氣勢勁爆嘅曼聯喺主場對李斯特城，總之想知道最新英超戰況，一於睇實我哋《東網》嘅不斷更新啦！
[2:20] 兩後備建功 曼聯贏李城2比0
全場結束，曼聯主場以2比0擊敗李斯特城，全取3分。今仗曼聯攻足全場，上半場先有桑馬達食「詐胡」及妙射被救出，下半場初段再有盧卡古12碼被卡斯柏舒米高擋出，紅魔致勝關鍵是領隊莫連奴及時作出兩個調動，先後換入拉舒福特及費蘭尼，兩人甫上陣立即取得入球改變戰局，成為曼聯的後備奇兵。
[2:07] 費蘭尼入波 曼聯贏到2比0
下半場82分鐘，曼聯贏到2比0。曼聯打破缺口之後，領隊莫連奴立即作出第2個調動，換入費蘭尼穩住防線，卻收到意想不到效果，連格突破越位左路傳中，費蘭尼門前用大脾撞入，為曼聯擴大比數至2比0。
[1:56] 拉舒福特入波 曼聯領先1比0
下半場70分鐘，曼聯領先1比0。紅魔佔壓倒性攻勢，控球比率接近80%，領隊莫連奴作出調動，拉舒福特後備上陣即建殊攻，這位小將接應角球近門施射，卡斯柏舒米高雖碰到皮球仍然入網，曼聯終於打開紀錄。
[1:38] 盧卡古主射12碼 舒米高救出
下半場再開，52分鐘，圍攻李城之下曼聯博得12碼，安東尼馬迪爾傳送，丹尼森遜禁區內犯手球，球證判罰12碼，由盧卡古主射，但又被卡斯柏舒米高擋出，賽事維持0比0。
[1:15] 舒米高多次神救 曼聯李城半場0比0
英超大戰曼聯對李斯特城，半場暫時互無紀錄。紅魔挾兩連勝氣勢，甫開賽即展開強攻，可惜18分鐘桑馬達一次近門補射入網被誤判越位在先慘食「詐胡」，門將卡斯柏舒米高在奧脫福演出有其父親影子，化身鋼門作出多次神救，是李城力保不失的功臣。
[0:50]
賽事初段曼聯展開強攻，18分鐘盧卡古禁區頂勁射，被李城門將卡斯柏舒米高救出，桑馬達補射入網但球證指越位在先判「詐胡」，但慢鏡睇番桑馬達平排冇越位，真係慘！2分鐘後桑馬達禁區內撞射，再被卡斯柏舒米高飛身救出，李城唔輸都算好彩。
[0:00]紅魔變陣 馬迪爾代福仔擔正
英超周六壓軸大戰由曼聯主場對李斯特城，近況大勇嘅「紅魔鬼」今場人腳只有一個變動，就係由連續兩場有入波嘅法國前鋒安東尼馬迪爾，頂替小將拉舒福特擔正。今場波仲係兩大射手盧卡古同占美華迪嘅對決，大戰當前，大家記得睇實我哋文字直擊！
曼聯正選陣容
門將：1迪基亞
後衞：25路爾斯華倫西亞、4菲爾鍾斯、3艾歷拜利、17戴利白蘭特
中場：6保羅普巴、31尼曼查馬迪、8桑馬達
前鋒：11安東尼馬迪爾、9盧卡古、22米希達利恩
李斯特城正選陣容
門將：1卡斯柏舒米高
後衞：2丹尼森遜、15哈利馬古尼、5韋斯摩根、28基斯甸富治斯
中場：26馬列斯、22馬迪占士、25尼迪迪、11馬克艾拜頓
前鋒：20岡崎慎司、9占美華迪
[23:49]
全場打完，修咸頓尾段連續有幾個入球機會，中堅吉田麻也助攻近門撞射射斜，仲有賴恩貝特蘭門前頭槌被護空門解圍，最後雙方打和0比0，新升班嘅哈特斯菲爾德開季3戰保持不敗兼冇失波，3戰得7分，仲憑較佳得失球反壓曼城上榜首。
[23:40]
84分鐘，修咸頓下半場攞番唔少攻勢，列特文喺禁區邊熨射，畀主隊門將祖拿斯盧素飛身救出，雙方依然未開紀錄。
[22:46]
「神奇球隊」哈特斯菲爾德主場對修咸頓之戰，上半場主隊延續之前2連勝氣勢，合共9次射門，製造連番險象，雖然仲未入到波，但優勢明顯。「聖人」除咗早段有列特文單刀射斜之外，之後不斷捱打，下半場再冇起色的話，或會3分全失。
[22:30]
30分鐘，哈特斯菲爾德前鋒穆尼爾接應傳中近門撞射，貼柱出界。哈軍已經累積6次射門，形勢佔優。
[22:19]
哈特斯菲爾德先有卡真加近射，畀修咸頓中堅吉田麻也閂出，轉頭輪到穆尼爾埋門，又過唔到「聖人」門將費沙科士打。
[22:00]哈特斯菲爾德 Vs 修咸頓
哈特斯菲爾德主場對「聖人」修咸頓開波喇。
[21:30]般尼茅夫 1:2 曼城
英超頭場打完，曼城喺補時7分鐘入波反勝般尼茅夫2比1，暫時坐上「一哥」之位。跟住出場輪到開季2戰全勝嘅哈特斯菲爾德，會喺主場對修咸頓，正選陣容出咗，又睇吓佢哋能否延續奇蹟之旅。
哈特斯菲爾德正選陣容
門將：1祖拿斯盧素
後衞：25真卡佐真遜、15基斯路維、26基斯杜化舒捷拿、2湯史密夫
中場：17雲拿柏拉、10阿倫穆爾、22湯馬士恩斯、8菲臘標寧
前鋒：9卡真加、24穆尼爾
修咸頓正選陣容
門將：44費沙科士打
後衞：2薛迪索拉斯、3吉田麻也、5積克史堤芬斯、21賴恩貝特蘭
中場：8史提芬戴維斯、11杜辛泰迪治、14奧里奧爾羅美奧、22列特文
前鋒：18勒美拿、20加比亞甸尼
[21:26]
97分鐘，補時已較原定多2分鐘，曼城靠史達寧接應傳中近門射遠柱入網，反超前2比1，史達寧慶祝入球過激，被罰個人今場第2面黃牌被逐，現場氣氛相當緊張。轉個頭全場打完，曼城全取3分，3戰得7分。般尼茅夫則是3戰3敗，新季仍未有分落袋。
[21:01]
74分鐘，曼城前場左路角球，中堅奧達文迪近門頭槌頂中柱彈出，般尼茅夫門將比高域接番。曼城自從換入阿古路後，攻勢逐漸到肉。
[20:47]
61分鐘，般尼茅夫前場逼甩曼城守將腳下球，中場舒文左路地波傳中，前鋒祖舒亞京治禁區內無人看管起左腳第一時間撞射，中柱彈出，比數仍是1比1。
[20:16]
半場打完，雙方打和1比1。曼城自從追和後逐漸攞番優勢，上半場控球比率超過6成。臨完半場前，「藍月亮」仲有機會反超前，費蘭甸奴近門右路勁射，僅被主隊門將比高域擋出，般尼茅夫大難不死，睇吓有冇後福啦！
［19:50］
21分鐘，曼城前場快開罰球，接應嘅大衞施華中路再直線妙傳畀加比爾捷西斯，後者殺入禁區快腳射遠柱入網，追和1比1。
[19:48]
19分鐘，主場嘅般尼茅夫幾乎又入一粒，迪科爾接應舒文傳中，離門12碼第一時間施射，僅被曼城門將艾達臣摩拉斯飛身救出。
[19:41]
開賽12分鐘，般尼茅夫守將查理丹尼斯禁區邊左路窄位狂抽，個波中楣底彈入，領先曼城1比0，亦係般尼茅夫今季英超首個入波。
[19:00]
賽前雙方公布正選陣容，曼城主帥哥迪奧拿令人意外收起射手阿古路，改用加比爾捷西斯做單箭頭去砌般尼茅夫，史達寧同貝拿度施華嘅側擊會係佢哋能否贏波關鍵。至於來自摩納哥嘅新兵左閘班捷文文迪更首次獲得上陣機會。另邊廂，般尼茅夫要攞到今季英超第1分，睇怕難度唔細，佢哋個「4-4-2」陣容唔知頂到幾耐呢？
般尼茅夫正選陣容
門將：27比高域
後衞：26泰朗明斯、15阿當史密夫、3史堤夫曲克、11查理丹尼斯
中場：4丹高士寧、6舒文、8哈利艾達、5尼敦阿基
前鋒：17祖舒亞京治、18迪科爾
曼城正選陣容
門將：13艾達臣摩拉斯
後衞：3丹尼路雷斯、4高柏尼、30奧達文迪、22班捷文文迪
防中：25費蘭甸奴
中場：7 史達寧、21大衞施華、17奇雲迪布尼、20貝拿度施華
前鋒：33加比爾捷西斯
東網體育同你追實體壇每個精彩時刻！